"Центерра Голд Инк." компаниясынын Директорлор кеңешинин айрым мүчөлөрү өз ыйгарым укуктарын мөөнөтүнөн мурда токтотуу жөнүндө арыз беришти

"Центерра Голд Инк." компаниясынын Директорлор кеңешинин "Кыргыз алтын" компаниясы тараптан мүчөлөрү Калыйнур Садыров менен Эмил Орозбаев өз ыйгарым укуктарын мөөнөтүнөн мурда токтотуу жөнүндө арыз беришти. Бул тууралуу Жогорку Кеңештин "Республика – Ата Журт" фракциясынын кезектеги жыйынында "Центерра Голд Инк." компаниясынын акцияларынын кошумча эмиссиясы боюнча маселе каралып жатканда белгилүү болду.

"Кыргыз алтын" компаниясынын төрагасынын орун басары Бектур Сагыновдун пикиринде, Калыйнур Садыров менен Эмил Орозбаев Директорлор кеңешинин кыргыз тараптын таламын талашкан мүчөсү катары өздөрүнө тагылган милдеттерди толук аткара алган жок. "Кыргыз тарап "Центерра Голд Инк." компаниясынын Директорлор кеңешинин акцияларынын кошумча эмиссиясын чыгаруу чечимине каршы болчу. Алар Директорлор кеңешинин калган мүчөлөрүн ынандыра алышкан жок", - дейт ал.

"Центерра Голд Инк." компаниясынын Директорлор кеңеши 4 миллион 600 миң кошумча акция чыгаруу чечимин кабыл алган. Азыр ал акциялардын бир бөлүгү чыгарылды, дагы бир бөлүгү сатыкка даярдалууда. Мындай кошумча акцияларды чыгаруу "Центерра Голд Инк." компаниясынын акцияларынын кунунун бекемделишине терс таасирин тийгизет. Ошондон улам мамлекеттик үлүштөгү "Кыргыз алтын" компаниясы мындай кадамга каршы болгон.

"Центерра Голд Инк." компаниясынын Директорлор кеңешинде кыргыз тараптын үч мүчөсү бар. Эгерде Калыйнур Садыров менен Эмил Орозбаевдин ыйгарым укуктары мөөнөтүнөн мурда токтотулса, бир гана мүчө – Кылычбек Шакиров калат. Ошондон улам азыр бош орундарга сынак жарыяланып, жаңы талапкерлер тандалууда.

Белгилей кетсек, "Центерра Голд Инк." компаниясы 2015-жылы "Кумтөр" кенинен 16,2 тонна алтын казып алган.