Ички иштер министринин биринчи орун басары Сүйүн Өмүрзаков жер-жердеги кээ бир жетекчиликтер тарабынан жумушту уюштуруу, элдин коопсуздугун тиешелүү түрдө камсыз кылуу, кылмышка каршы күрөшүү боюнча кемчиликтер бар экенин министрликтин коллегиясында билдирди.
"Муну ачык эле айтыш керек, кээ бир жетекчилер тарабынан өз милдеттери так аткарылбай келүүдө. Себеби жарандар жер-жерлерден арызданып, министрликке чейин келип жатат. Бул жергиликтүү жетекчилер тиешелүү түрдө иштебейт дегенди билдирет. Жарандардын арыздары өз убагында каралбай, алар ары-бери жөнөтүлүп, убара болушууда", - деген Сүйүн Өмүрзаков.
Сүйүн Өмүрзаков Патрулдук милициянын ишмердүүлүгүнө да токтолуп, негизинен бул кызмат жол жана коомдук тартипти камсыз кылууга багытталып, милициянын жаңы образы катары эл менен иштешет деген максатта түзүлгөнүн белгиледи.
"Азыркы убакта бул кызмат тиешелүү натыйжа бербей келүүдө. Ар бир фактыга токтолбой эле коёюн, бирок жер-жердеги Патрулдук кызматтар тарабынан элге орой мамиле жасалганы, айдоочулардан пара алуулар дагы эле токтой элек. Бул учур ачыкка чыкпаганы менен, муну элдин баары билет. Албетте, бул милицияга болгон элдин ишенимин, жаңы түзүлгөн кызматка болгон ишенимин жоготууга алып келет", - деген өз сөзүндө орун басар.
Коллегияда коомдук жайларда бейбаштык, денеге оор залал келтирүү, адам өлтүрүү, тоноо жана башка кылмыштардын саны Бишкек, Чүй, Ысык-Көл, Талас, Ош шаары, Жалал-Абад жана Ош облустарында өсүп кеткендиги баса белгиленди.