ЖЫЛНААМА, 5-ФЕВРАЛЬ: Бразилиялык футболчу Неймар да Силва 25ке чыгып жатат

Габриэлла Лензи

Бруна Маркизини менен

Баласынын апасы Каролина менен

Мындан 25 жыл мурун, 1992-жылы 5-февралда Бразилия курама командасынын жана каталондук "Барселонанын" жарым коргоочусу Неймар да Силва Бразилиянын Сан-Паулу штатында туулган. Футболчу буга чейин Бразилия курама командасы менен Конфедерациялар Кубогун уткан (2013). Бразилиялык "Сантостун" курамында 2011-жылы Либертадорес Кубогун утуп, анда 11 голу менен мыкты бомбардир аталган. 2013-жылы жайында каталондук "Барселонанын" курамына кошулуп, Испаниянын Суперкубогун утуп алган. Каталондук клуб аны курамына кошуу үчүн 57 миллион евро сарптаган.

2015-жылы Неймар “Барселонанын” курамында УЕФАнын Чемпиондор Лигасын, Испания чемпиондугун, Испания Кубогун, УЕФАнын Суперкубогун жана клубдар аралык Дүйнө чемпиондугун уткан. Ал бул мелдештердин баарында чечүүчү ролду ойногон. УЕФАнын Чемпиондор Лигасында 10 гол киргизип, Криштиану Роналду жана Лионель Месси менен биргеликте бул мелдештин башкы бомбардири аталган.

Жылдын соңунда Эл аралык Футбол федерациясынын версиясы боюнча дүйнөнүн мыкты футболчусуна ыйгарылуучу “Алтын топ” сыйлыгына талапкер болуп, добуш берүүнүн жыйынтыгында ал сыйлыкка негизги талапкер 3 футболчунун катарына кирген (ред.- Лионель Месси жана Криштиану Роналдудан кийинки орунда).

Неймар 2011-жылдын августунда уулдуу болгон. Ата болгондо ал 19 жашта эле. Уулуна Давид Лукка деген ысым ыйгарган. Кызыгы, ага уул төрөп берген сүйүктүүсү Каролина анда 17 жашта болчу. Футболчу аны менен мамиле кура алган эмес. Андан кийин актриса Бруна Маркезини менен 2 жыл мамиледе болуп, кайра модель Габриэлла Лензи менен сүйлөшө баштаган.