Чаткал районунда жергиликтүү тургундар миң гектарга жакын жердин алтын казган ишканага берилишине каршы чыгышууда. Бул тууралуу бүгүн, 10-февралда SUPER.KG порталына жергиликтүү тургундардын бири билдирди.
Анын айтымына караганда, Чаткал районунун Каныш-Кыя айыл аймагындагы Түлөберди, Чаар-Таш сайларында 20 тоннага жакын алтын кени бар. Ал жерди Кытай жаранына таандык компанияга берүү аракети көрүлүүдө.
"Аукционго коюлуп жаткан жердин аянты болжол менен 998 гектар. Жергиликтүү жашоочулар бул нерсеге каршы. Анткени сайдын башынан агып келген суу менен 400-500 гектарга чукул жер сугарылат. Эгер кен иштетилсе, суунун нугу бурулуп кетеби деген кооптонуу болууда. Жайында аталган сай жайыт катары да колдонулат. Ошондой эле айыл менен кен казган жердин ортосу болжол менен 20 чакырымды түзөт. Уулуу заттар элдин ден соолугуна зыян алып келбейт деп ким кепилдик бере алат?" - дейт жергиликтүү тургун.
Ошондой эле тургун жер боюнча экинчи аукцион 2-мартта өтөрүн, аны Кытай жаранына таандык "Асман-Тоң тоо аймагы" ишканасы сатып алууну көздөп жатканын кошумчалады.