Сүйүшкөндөр күнү тууралуу көптөгөн ойлор айтылууда. Бири бул майрам биздин менталитетке туура келбесин айтса, бири жылына бир жолу келген кубанычтуу майрамды тосуу жагымдуу экенин айтышат.
Бул майрамды кубануу менен тоскондордун арасында ырчы Айгерим Расул кызы бар. Анын айтымында, жолдошу жыл сайын бул күнү сөзсүз түрдө гүл берет.
"Жолдошум экөөбүз майрам болбогон күнү деле майрамдап коёбуз. Бүгүн өзүбүз эле бир жакка барып белгилеп келели деп жатабыз. Салт болуп калды окшойт дайыма ушул күнү жолдошум үйдүн ичин розалардын желекчелери менен кооздойт. Жыл сайын эле бири-бирибизге белек беребиз. Ал мага сөзсүз түрдө гүл, ага кошумчалап зер буюмдардан, атырлардан берет.
Сүйүшкөндөрдүн бир эле ушул майрамы бар экен, андыктан майрамдайбыз. "Мындай майрам мусалмандарда жок" дешет, бирок азыр эшикке чыксаң, мырзалар кыздарына гүл, оюнчук берип, жетелешип жүрүшкөн болушат. Демек, баары бул майрамга маани берет. Жаңы жыл майрамы деле дин боюнча жок, бирок майрамдап эле жүрөбүз", - деди Айгерим Расул кызы.
"Сүйүшкөндөрдү майрамы менен куттуктайм! Өзүлөрүнүн бактысын табышсын. Көп байкайм, досторум "14-февралды жалгыз тосомбу?" деп, көпчүлүк кыздар ушул күнү "түгөйүм болсо экен" деп тиленишет... Анын сыңарындай, бардык адам өз түгөйүн таап, бактылуу болушсун", - деген тилегин айтып өттү.
Ал эми "тамашоучу" Самат Эркинбек уулу бул майрамды кадимки күндөй эле кабыл аларын айтып, бүгүн "Моника Белуччи" командасынын концертине барарын кошумчалады:
"Келинчегим менен сүйлөшүп жүргөндө эле белгилечү эмеспиз. Бирок бүгүн эми гүл берет окшойм (күлүп). Жылда эле жөнөкөй күн катары өткөрүп коёбуз. Көбүнчө келинчегиме туулган күнүндө, 8-мартта белек берем", - деди Самат Эркинбек уулу.
"Сүйүшкөндөргө кааларым, үйлөнө электер үйлөнүшсүн, бактылуу болушсун. Эң негизгиси, сүйүү көп болсун", - деген каалоо-тилектерин айтып өттү "тамашоучу".
Ал эми "Сүйүшкөндөр күнүнө" каршы болгондордун бири "тамашоучу" Актан Рыскелдиев бул майрамды билер замат ага каршы чыкканын айтат.
"Биз бүгүн майрамдаган жокпуз, кечээ эле майрамдап койгонбуз. Себеби келинчегим экөөбүз нике күбөлүгүбүздү атайын 13-февралда алып, өзүбүздүн майрамыбыз деп белгилегенбиз. "Сүйүшкөндөр күнүн" белгилөө туура эмес. Биринчиден, бул шариатка туура келбейт. Экинчиден, сүйүү бир эле күн менен чектелип калбайт. Мисалы, мен келинчегиме күндө сүйөрүмдү айтам. Анан бир күндө айтып, ресторанга алып барып койсом "рисовка" болуп калат го. Биз үчүн ар бир күн майрам. Экөөбүз сүйлөшүп жүргөндө эле бул күндү белгилебейбиз деп айткам, ал туура түшүнгөн, таарынбайт", - деди "тамашоучу".
Ошондой эле Актан Рыскелдиев жубайына күндө "сюрприз" кылууга аракет кыларын, кечээки майрамына Сочиден атайын белек ала келип бергенин кошумчалады.