«Супер-Инфонун» тандоосу боюнча «2009-жылдын супер спортчусу» наамынын ээси Азамат Байматов 2013-жылы үйлөнгөн эле. Жыл айланбай кайрадан бойдок статусун алган футболчу бизге жеке жашоосундагы, карьерасындагы кызыктар жөнүндө кеп салып берди.
– Салам, Азамат! Маек төрүбүзгө куш келипсиӊ! Жакында УЕФА Чемпиондор Лигасынын финалы болот, кайсы команданы жеӊет деп ойлоп жатасыӊ?
– Саламатсыздарбы? Мен ашынган футболдун сүйүүчүсү катары дайыма шоу-бизнестеги досторум менен ири футбол мелдештерин чогуу көрөм.
УЕФАнын бул жолку Чемпиондор Лигасынын финалчылары тууралуу айтсам, албетте, италиялык «Ювентус» футбол клубу «Реал Мадридди» утуп, чоӊ чакырык таштады. «Ювентус» командасына күйөрмандык кылып жатам. Анткени алар 12 жылдан бери финалда ойной элек, дарбазачысы Жанлуиджи Буффон бир да Чемпиондор Лигасын уткан эмес. Андыктан бул жолу аларда өтө жакшы мүмкүнчүлүктү колдонууга шарт бар. Көпчүлүгү алдын ала «Барселонага» жеӊишти ыйгарып жатышат, менимче, финалдык оюнда күтүүсүз жагдайлар көп болот. Анткени футболдо дайыма күчтүү команда жеӊе бербейт. Менин божомолум боюнча, «Ювентус» финалда пенальти сериясында утат.
– Биз сени дайыма «Тамашоу» долбоорунун калыстар тобунан көрүп калабыз...
– 2009-жылы Латвияда жашап жүргөндө досторум менен Юрмала шаарына атайын КВН көргөнү барчубуз. Андыктан КВНге болгон кызыгуум кокусунан эмес. «Тамашоу» долбооруна 2011-жылы 4-сезондун Кышкы фестивалында алгачкы жолу калыс болуп отургам.
Эсимде, ошондо мен ойногон «Дордойдун» «Алга» командасы менен беттеши бар болчу. Аябай маанилүү оюн эле. Машыктыруучумдан сурансам жибербей койду. Бирок биздин оюн саат төрттө, ал эми «Тамашоунун» финалдык оюну алтыда башталмак. Кудай буюруп, машыктыруучум мени биринчи таймдан кийин башка оюнчу менен алмаштырды. Жанымда костюм-шымым бар болчу, чуркап таксиге отуруп анын ичинен кийим алмаштырып, финал мына башталат дегенде кирип бардым. Менде мындай окуялар көп эле болот.
– Кинонун бет ачары болобу же концерт болобу сени көп көрөбүз, мындай жашоо образы өзүӊө жагабы?
– Үйдө отурганды жаман көрөм, кичинемден активдүү жашоо образын сүйчүмүн. Мисалы, шоу-бизнестеги Омар, Урмат Усенов, Эрмек Нурбаев, Улан Барпиев менен өзүбүздүн шеринебиз бар. Спорттогу досторум менен катышам. Акыркы жылдары жылдыздар да футболго кызыгып калышты, аларга машыктыруучу боло коём.
Мени бир гана кечелерден эмес, кайрымдуулук иш-чаралардан деле көрүүгө болот. Негизинен өлкөдө болуп жаткан маанилүү окуяларды калтырбаганга аракет кылам.
– Жубайыӊ Айжан менен ажырашканыӊды билебиз, ата-энеӊ бул окуяны кандай кабыл алышты?
– Бул окуя менин да, ата-энемдин да жүрөгүн тызылдатып өттү. Бул жолдон эч кимибиз жеӊил өткөн жокпуз. Мага да, Айжанга да, экөөбүздүн ата-энелерибизге да оор болду. Аз убакыт эле сүйлөшүп, ата-энелерибиздин «шашпай тургула» дегенине болбой үйлөнүп алган элек. Жаштык кылып койдук окшойт. Сөздүн ачыгы, мен деле ажырашып кетейин деп үйлөнгөн эмесмин, андай оюм болсо ошондой чоӊ той берип, колун сурап үйлөнмөк белем? Бактылуу болоюн, бала-чакалуу болоюн деген жакшы эле ниеттерим бар болчу. Айжанды жамандагым келбейт, болгону тагдыр экен. Анын ата-энеси жакшы адамдар, ага бакыт гана каалайм. Өз жолун таап кетсе сүйүнөм. Мен да өз бактымды табарыма ишенем.
– Демек, ажырашууӊ турмуштун оор сыноосу болуптур да?
– Жашоону бара-бара түшүнөт экенсиӊ, бул мен үчүн жакшы сабак болду окшойт. Бирок үйлөнүп-ажырашканыма өкүнбөйм, баары өттү-кетти, ал нерсеге кайрылгым келбейт.
Менде турмуштук сыноолор көп эле болгон. 2013-жылы Казакстанга барарым менен боорум ооруп, дарыгерлер «футболду ташташыӊ керек» деп айтышкан. «Жок, мен ойнойм» деп көгөрүп жатып, бир жыл дарыланып калыбыма келдим. Ошол учурларды жашоомдун эӊ оор күндөрү деп айтар элем, анткени спортко ошол бойдон кайтпай калышым мүмкүн эле. Бирок мен кайтып келдим, ушул күндөр үчүн Кудайга рахмат.
Спорттогу ийгиликтерим, учурда тынымсыз эмгектенип жатканымдын баары келечектеги үй-бүлөмдүн пайдубалын түптөө үчүн болгон аракетим. Балдарымдын кем-карчы жок татыктуу жашоосу үчүн бүт шартты түзүп беришим керек. Спорттогу карьерам бүтсө, ишке ашырчу жакшы долбоорлорум бар, аймактарга кооз, инфраструктурасы мыкты стадиондорду кургум келет.
– Учурда жандаган селкиӊ барбы деген суроону бербей кетсем, күйөрман кыздарыӊ таарынып калышат го...
– Бар же жок деп айта албайм. Сүйлөшкөн кызым бар деп койсом элдер үйлөнбөйбү, качан үйлөнөт дей беришет экен.
– Өзүӊ тууралуу түрдүү кептерге кандай реакция кыласыӊ?
– Өзүм жөнүндө кандай кеп айтылбасын жүрөгүм аркылуу өткөрүп, көӊүлүмө жакын кабыл алам. Мени «футбол талаасында катаал ойнойсуӊ» деп айтышат, бирок бул катаалдык оюн талаасында эле. Жашоодо абдан жашыкмын, сезимталмын, үйдө бышактап ыйлап сериал көргөн учурларым болот. Чет өлкөдөгү беттештерде Кыргызстандын гимни жаӊырганда көзүм жашылданып кетет. Латвияда бир жылдай жүрүп Кыргызстанга келгенде апам аэропорттон тосуп алды, ошол күнү кечке кучакташып ыйлаганбыз.
– Маегиӊе чоӊ рахмат, айтылган ойлоруӊ орундалсын!
Лунара Бекиева
star@super.kg