Адатка айланган SUPER.KG порталынын түз эфиринин кадырлуу мейманы «Мен ашык», «Арман» жана башка муңдуу ырлары, «Карагул ботом», «Күзгү жалбырак» тасмалары аркылуу таанылган ырчы, актриса Гүлнур Асанова болду. Ырчы сыркоолоп калганына карабай түз эфирден келген суроолорго жооп берип, комуздун коштоосунда жандуу үн менен обондорду созуп отурду.
– Саламатсызбы, Гүлнур эже? «Малдын эти сатылат» деп жарнамалап калдыңыз, мал менен бизнес кыласызбы?
– Жок. Менин курсташым малдын этин сатып, ишкердик кылат. Менден курбума жардам болсун деп жарнамалагам.
– Социалдык баракчаңыздан өздөрүнүн азыктарын, каражаттарын жарнамалап бер дегендер болобу?
– Жарнама кылып бер деп кайрылгандар көп. Өзүм колдонуп көрүп, анан жарнамалайм. Бир жолу мындай окуя болгон. Приправа алып, аны жарнамалап койгон элем. Ошондон кийин «ачып кетти, кычып кетти» деп мага асылышкан. Эми ачыса бирөө же экөөсү ачыгандыр. Ошондон кийин сапатына катуу көңүл буруп калдым.
– Эмнеге тасмаларга тартылбай калдыңыз? Мүмкүнчүлүк болсо чет элдик тасмаларга тартылбайсызбы?
– Менин катышуумдагы жаңы тасмаларга жакынкы арада күбө болосуздар. Анда шайыр жеңенин ролун жараттым.
– Эмнеге жаңы чыгарма жазбай калдыңыз?
– Лирикалык «Эмнеге бердиң?» деген жаңы чыгарма жаздым. Бул чыгарма 3 күндүн ичинде жазылды. Азырынча аранжировкасын баштай элекпиз. Жакын арада күбө болосуздар.
– Гүлнур, тасмаларда кайгылуу, турмушу оор ролдорду жаратып келесиң. Ушундай ролдор жагабы?
– Трагедия болгондон кийин анын сценарийи кыйын болот. Чындыгында, андай ролду жаратуу жакпайт. Бул режиссёрдун тандоосу, сунушу. Азыр мындай сунуштардан баш тартып калдым. Себеби жашооңо да таасирин берет экен.
– Чыгармачылыктан тапкан каражатыңыз кымбат баалуу унаага, көп кабаттуу элиталуу үйдөн батир алганга жетеби?
– Өтө деле элиталуу батир эмес. Батирди былтыркы шайлоодогу үгүт концертине чыкканым үчүн бартердик негизде алгам. Батирди жалгыз мен эмес, Динара Акулова, Нурзат Токтосунова эжелер деле алышкан. Эми эл катары эле үй, унаа алууга каражатым жетет.
– Бетиңиздеги меңдер убакыттын өтүшү менен чоңоёбу? Алдырып салууну ойлонбой элесизби?
– Ооба, убакыттын өтүшү менен меңдер чоңоёт экен. Алдырып салайын деп текшерүүдөн өткөм. Дарыгерлер алдыра турган болсом рак клеткаларын козгойт дегенинен бул оюмдан кайткам.
– Инстаграмдан "мени жаман көрө бересиңер" деп нааразычылыгыңызды билдире бересиз. Комментарийлерге жооп жазганга кантип үлгүрөсүз? Айрымдары менен айтышып да кетесиз го...
– Мурун күйөрмандарым жакшы сөзүн айтып, колдоп турушчу. Акыркы күндөрү жагымсыз сөздөрдү жазгандар көбөйүп кетти. Менин атымдан ачылган фейк баракчаларга анча-мынча күйөрмандарым сатылып кетишти окшойт (күлүп). Чындыгында мени эле күнөөлөгөн болбойт. Негизи ар бир комментарийге жооп жазганга үлгүрбөйм. Менин атымдан фейк баракчаларды ачышып, менин ордума жооп берип, билдирүү калтыргандар болот. Шарды үйлөй берсең жарылат го, ошол сындуу өзүм деле кээде жооп жазам.
– Сиздин колуңузду журналист Шайырбек Арапов сураган дешет. Сунушунан баш тартканыңызга өкүнбөйсүзбү?
– Шайырбек Арапов экөөбүз жердешпиз, Аксыдан болобуз. Анын кесиби журналист болгондуктан эфирлерге көп чакырчу. Бирок эч кандай мамиле болгон эмес. Бул чындыкка окшошпойт экен.
– Гүлнур, сенин ажырашканыңды апаң, бир туугандарың кандай кабыл алышты?
– Албетте, жакшы кабыл алган жок. Ажырашуум аларга оор тийди.
– Жолдошуң Бактияр жарашып алалы деп аракет кылып жатабы? Кайын журтуң жарашкыла деп алдыңа келдиби?
– Ооба, Бактияр да, кайын журтум да келген. Бир чечим кабыл алгандан кийин аны өзгөртүп, артка кайрылгым келген жок. Апам, эжем кеңештерин айтып, багыт берип жатты. Бирок баары бир чечимди өзүм чыгардым. Анткени мага 100 пайыз убада берген адам сөзүнө тура алган жок. Анын үстүнө адам турмуш курганча башка, турмуш кургандан кийин такыр башкача болот экен.
– Жолдошуңду карапайым үй-бүлөдөн чыккан, турмушу оор деп кетип калган дешет. Сен бакыт эмес, байлыкка умтулган адамсыңбы?
– Бул мага карата токулган жомоктордун бири. Мен үчүн материалдык байлык эмес, адамдык сапат жогору турат. Ал адам мени менен кандай максатта турмуш курганын кийин түшүндүм. Башында жаңылыштык кылып жатам го деп ойлодум. Бирок адашпаптырмын, азыр өкүнбөйм.
– Гүлнур эже, мен сизден кичүүмүн. Мага турмушка чыгыңызчы, иштетпей багып алам.
– Түз эфирден баш кошуу сунушун киргизүү мода болуп жаткан окшойт. Өзүмдөн кичүү мырзалардан көңүлүм калды (күлүп). Азырынча кайрадан турмуш курууну ойлонгон жокмун.
– «Эл эмне дейт?» деп бактысыз болуп жашаганча, ажырашып туура кылгансың. Колуңду сураган мырзалар көп болуп жатыптыр, бирөөсүнө тандоо жасадыңбы?
– Ажырашкандан кийин мага сүйүүсүн билдирип, колумду сурагандар көбөйдү. Алардын каттарын окудум, бирок жүрөгүмө жакын кабыл алган жокмун. Ошондуктан азыр бирөөсүнө токтолуп, тандоо жасай элекмин. Эрте деп ойлойм.
– Жашоодон кандай сабак алдыңыз?
– Убакыттын токтобошун, жашоонун уланышын жана эч нерсе түбөлүктүү эмес экенин түшүндүм.
– Мен дагы жолдошум менен ажырашып, депрессияга түшүп кеттим. Сиз кантип чыктыңыз, кеңеш бериңизчи.
– Дарыгерлерге кайрылганымда «рак клеткаларын, оорунун баарын таарыныч, кайгы, стресс, депрессия козгойт» дешти. Андыктан өзүңөрдү алдырбай, унутканга аракет кылгыла. Мен депрессияга кабылганда дүкөн аралап, жаккан буюмдарды сатып алдым. Убакытты бекер өткөрбөй бир нерсе менен алек болуш керек. Бош болсоң эле ой курчап баштайт.
– Чыгармачылыктан сырткары жеке ишкердик менен алектенесизби?
– Унааны стресстен чыгуу үчүн алгам, айтпай калган турбаймынбы (күлүп). Айтышыңар мүмкүн «бизде андай каражат жок болсо кантип алабыз?» деп. Мен деле «лап» этип эле алып алган жокмун. «Жарымын азыр, жарымын кийин акча болгондо берем» деп алгам. Ал эми жеке ишкерликти айтсам, ооба, үзгүлтүксүз киреше алып келген ишим бар. Бирок аны ачыкка чыгарбай келгем, эми деле жашыруун тутам.
Бактыгүл Момбекова
Адилет Бектуров
star@super.kg