Ырчы, аранжировкачы Амир Аскаров дагы талкууга жем таштады. Бул ирет Кайрат Кыргыз деген псевдоним менен өзгөчө стилде чыккан эстрада ырчысы Кайрат Салмакеевди кескин сындап чыкты. «Ассалому алейкум, улуу-урматтуу Эл артисти Кайрат Кыргыз байке. Сиз мени орой сындаганым үчүн кечириңиз, бирок мен үчүн кыргыз деген сөз эркекчилик дегенди элестетет. Андай нерсени мен сиздин сахнадагы образыңыздан (балким, сахнадагы эле эмес) байкай алган жокмун. Сизди бүт өлкө карап турат. Мисалы, жаш балдар, өспүрүмдөр жана улуулар. Менимче, сиз элге чыныгы кыргыз баатырдын образын көрсөтүшүңүз керек же кыргыз атын булгабаганыңыз оң. Ата, ага, кала берсе, эркек катары ойлонуп көрүңүз.
P.S.: Сиздин Эл артисти экениңизди билген эмесмин!» деп жазды ал интернеттеги өздүк баракчасына. Анын бул билдирүүсүн жектегени да, колдогону да болуп жатат.
Эске салсак, Амир буга чейин Дайыр Исмадияровду да «үнү жок» деп сындаган болчу. Кайрат Кыргыз Инстаграм баракчасында өзү тууралуу «Кыргыз Республикасынын Эл артисти» деп жазган. "Маданияттын мыкты кызматкери" төш белгисинин ээси Кайрат Салмакеев бул боюнча комментарий бере элек.