Ырчы, кинорежиссёр Мухтар Атаналиев учурда Бишкектин четиндеги Ак-Ордо жаңы конушунда жашайт. Бул конушка жарык, суу, жадакалса жол курула элек кезде ырчы алгачкылардан болуп там салганын айтат.
– Ушул жерде ушундай тамдуу болуп калганыма азыркыга чейин таң кала берем. Биздин жер тилкебиз бул жерде эмес, арыраакта болчу. Курулуш материалдарын алып келгени кетсем, усталар башканын жер тилкесине эле тамдын пайдубалын баштап салышыптыр. Кошуналарым деле туугандар болчу, аларга телефон чалсам «ушундай болуп калыптыр, эми эмне кылабыз десем. Мейли, эми ошол жер сиздики болсун» деп макул болушту.
Ошентип бул конушта алгачкылардан болуп 2011-жылы биз үй курдук. Башында шамал ышкырган, түнкүсүн чөөлөрдүн үнү угулган ай талаа болчу. Түнкүсүн үйгө жаткандан коркчубуз. Карагайларды орнотуп, жарык өткөрүүчү зым тартып, үйүңө жеткиче «эмнеге булар биздин жарыкты уурдап жатышат» деп зымды үзүп салышар эле. Ошентип башында кыйналдык.
Бул жерде такай жашаганыбызга 2 жыл болду. Ачыгын айтыш керек, бул жерге там салгандан кийин жарым эле жыл жашап, кыйналып, кайра шаардын ортосундагы бир бөлмөлүү үйүбүзгө көчүп кеткенбиз. Келсек эле бул жер шаар болуп кетиптир. Анан жер тамыбызды өнүктүрөлү, бак-дарак тигели деп кайра көчүп келдик.
Конок бөлмө
– Чыгармачыл адам болгондон кийин үйдөн киши үзүлбөйт, конокторду ушул бөлмөдө тособуз. Бул жер мага иштөөчү бөлмө катары да кызмат кылат.
Балдар бөлмөсү
– Бул уулдарымдын бөлмөсү. Бир кыз, үч уулум бар. Улуу уулум менен кызым өздөрүнчө үй-бүлө күтүп кетишкен. Азыр 2 уулубуз колубузда. Бирөө 1-курс, кичүүсү 6-класста окуйт.
Мен бала кезимден кара жумушту көп жасадым. 25 жашымда ооруга чалдыгып, ошондон кийин кара жумушту такыр жасабай калгам. Анын үстүнө шаардыктар жалкоо болуп калат экенбиз. Азыр чынында жеңеңден тил угуп жашайм. «Кара жумуш кылбайсың, балдарыңды үйрөтпөйсүң» деп жаңжал кылат. Эми балам экөөбүз сарай салалы деп аракет кылып жатабыз.
Коридор
– Башында бул жерди кичине үй кылалы деп ойлогонбуз. Бирок бири-бирине уланып отуруп ушундай там болуп калды.
Там курулгандан кийин усталарга «кичине эле бут чечкич кылып улап койгула» деп түшүндүрүп кеткем. Бир сутка жумуштар менен жүрүп келсем эле узун коридордун пайдубалын куюп салышыптыр. Анан кайра буздурмак белек, буйрук экен деп калдык. Коноктор «коридор менен келип, ар кимиңер өз бөлмөңөргө кирип кетет экенсиңер» деп мактап, долбоорун жактырып кетишет.
Уктоочу бөлмө
– Ооруп калгандан кийин жер там издегем да. Бул жерде нымдуулук жок. Байбичем экөөбүз ушул бөлмөдө уктайбыз.
Бакча
– Азыр помидорлор базарда
15 сом экен. Бирок кеп баасында эмес, кеп өз колуң менен өз бакчаңа отургузүп, үзүп жегениңде. Помидордун кызарып калганын көрүп 10 күндөй күнүгө «качан бышат?» деп карап отурдум. Бышканда баарыбыз тегиз бөлүп жедик, даамдуулугун сураба.
Жумуштан, шаардын жашоосунан чарчап келгенде, бакчада иштеп, короого суу сепкенде кадимкидей эс алам.
Схема
Сүйүн Кулматова
Адилет Бектуров
star@super.kg