Өткөн аптада Зере аттуу жаш кыздын "Кыз" деп аталган ырынын клиби интернетке жарыяланды. Аталган чыгарма жарык көрөрү менен көп талкууга жем таштады.
“БИЗ ӨЗҮБҮЗ ҮЧҮН ЭМЕС, БИРӨӨГӨ ЖАГЫНЫШ ҮЧҮН ЖАШАП КАЛДЫК”
Зеренин өзүнүн “Азаттыкка” берген маегинде ал: “Коомчулуктун ою биз үчүн абдан маанилүү, биз өзүбүз үчүн эмес, бирөөгө жагыныш үчүн жашап калдык. Азыркы учурда адамдардын биринчи эле сырткы келбетине, кийимине, бой-мүчөсүнө карата баа беришип, талкуулашат. Менден азыркыга чейин “эгерде клипти кайрадан тартсаң үстүңө бир нерсе кийип алат белең?” деп сурашат. Албетте, жок. Бул жөн гана образ. Эгерде бул образ жок болсо жана ич кийимчен чыкпасам клип мынчалык талкууга алынмак эмес деп ойлойм”,- деп айткан. Зере жогоруда айтылган маалымат булагына башында эле мындай сын-пикирлерге даяр экендигин билип, ушул кадамга барганын айткан.
Элдин сын-пикиринен коркпой ич кийимчен клипке тартылган каарманыбыз Зере Асылбек болгону 19 жашта. Бул ыр менен клип демейдегиден өзгөчө болгондуктан интернет колдонуучулары ыр менен клипти, Зеренин өзүн талкуулаганга өтүштү. Айрымдары “азаматсың, Зере, өз оюңду мыкты жеткирдиң” дешсе, “коомду жаман жакка үндөп жатасың. Бул биздин менталитетке туура келбеген көрүнүш” деп айыптагандар да жок эмес. Андан сырткары аша чаап “эгерде видеоңду өчүрүп, кыргыз элинен кечирим сурабасаң, жакында өлтүрүп кетебиз” деген сыяктуу коркутуулар келип жаткандыгын, бул боюнча милицияга арыз менен кайрылганын Зере интернеттеги жеке баракчасына жазды. Интернет колдонуучулары ырдын обону плагиат экенин айтып чыгышты. Алардын айтканына таянсак, Зере аткарып жаткан ырдын обону “Грей мырзанын 50 кыры” тасмасына саундтрек катары колдонулган Beyonce`нин “Crazy In Love” ырына окшошуп кетет.
“ООБА, ЗЕРЕ МЕНИН КЫЗЫМ. ЭРКИН КЫРГЫЗСТАНДЫН ЭРКИН ОЙ ЖҮГҮРТКӨН КЫЗЫ”
“Зере Асылбек кызымдын клиби чыкты. Клипке карата терс пикирлер менен катар эле мыкты деп баа бергендер арбын. Мага байланышып, куттук айткандардан тышкары “ботом, агай, бул "желмогуз" сиздин кызыңыз беле, сиздей педагогдун кызы да ушуга барабы?” деп жеке кат жазгандар да бар.
Ооба, Зере менин кызым. Эркин Кыргызстандын эркин ой жүгүрткөн кызы. Кичинесинен өз алдынча чечим чыгарганга, өз оюн ачык билдиргенге, жигердүү болууга, так максат коюп, ага жете билүүгө, акыйкатсыздыктар менен күрөшүүгө, чыгармачыл болууга, бирөөлөрдүн акысын жебегенге, бирөөлөрдү ыксыз күнөөлөбөгөнгө үйрөнгөн. Өлкөбүздөгү болуп жаткан окуяларга өзүнүн көз карашы бар. Азыр 19 жашта. 17 жашынан тартып ар кыл социалдык долбоорлорго жигердүү катышып келет. Коомубуздагы кыздарга, аялзатына карата теңсиз мамилеге күрөшчүл мамилеси бар. Өзгөчө Бурулайдын окуясы ушул алгачкы ырынын жаралышына түрткү болду.
Кечээ клип чыккандан кийин биздин үй-бүлөдө да кызуу талаш-тартыш жүрдү. Өзгөчө кызым менен апасы ич кийимчен чыкканы боюнча катуу тартышты. Бир сыйра ыйлап, буктарын да чыгарып алышты. Мен атасы катары кызымдын ушундай кийинип чыккандыгын колдоймунбу? Жок, колдобойм. Апасы колдойбу? Таптакыр колдобойт, караманча каршы. Анан кантип кызыңыздын ич кийимчен ырдап чыгышына мүмкүнчүлүк бердиңиз? Мен аны түшүнүүгө аракет кылдым. Анын тандоосун сыйлайм. Атасы болгондугум үчүн эле ага ыксыз кийлигише бербейм. Менден кеңеш, жардам сураса гана аралашам. Окуусунда, ишмердүүлүгүндө, чыгармачылыгында өз алдынча чечим чыгарып, ал чечимдерин негиздөөгө үйрөткөм. Демек, клипти тартуу боюнча түзүлгөн командасы менен биргеликте ошондой чечим кабыл алышса керек. Алардын да билгени бардыр...
Урматтуу социалдык тармактардагы досторум, менин бул чакан постум сиздердин мага болгон ишеничиңизге доо кетирген болсо кечирим сурайм. Токтоосуз мени достуктан чыгарып коюңуз.
Баса... Ар тараптан айтылган сындардан улам клипти кайра тартууга мүмкүнчүлүк түзүлүп калса кийлигишет белем? Жок, кийлигишпейт элем. "Кызым, өзүңөр чечим кабыл алгыла" демекмин!”.
Жаңыл Ниязбекова
star@super.kg