Виталий Люкс, Кыргыз курамасынын чабуулчусу: “УЛУТТУК КУРАМГА ОЙНОО СУНУШУ ТҮШКӨНДӨ ОЙЛОНБОЙ ТУРУП МАКУЛ БОЛДУМ”

Виталий Люкс Кыргыз курамасынын катарына 2015-жылы чакырылган. Анын жылдызы Азия Кубогунда жанды. Жигиттер анын Филиппин курамасына киргизген кооз голдоруна баа берсе, кыздар анын жылмаюусуна ашык болушту. Президенттин колунан “Даңк” медалын алууга жетишкен Виталий менен маек курдук.

Аты-жөнү – Люкс Виталий Валентинович

Туулган жылы – 1989-жыл, 27-февраль

Туулган жери – Кара-Балта шаары

Бою – 183 сантиметр

Салмагы – 80 килограмм

Жылдыз белгиси – Балык

Үй-бүлөлүк абалы – Бойдок

Учурда – Кыргыз курамасынын жана Германиянын регионалдык лигасындагы “Ульм 1846” командасынын чабуулчусу

– Салам, Виталий. Азия Кубогуна ийгиликтүү катышып, “Даңк” медалын алышыңыз менен куттуктайм. Плей-оффтук баскычка командабыз чыгарына ишендиңиз беле?

– Куттуктоолор үчүн чоң рахмат. Биздин өлкөбүз үчүн дебюттук болгон Азия Кубогуна командабыз менен бирге Катар мамлекетинде бир ай күжүрмөн даярдык көрдүк. Биз бул мелдешке күчтүү жана тажрыйбалуу командалар менен кызыктуу оюн көргөзүү менен жакшы жыйынтык үчүн барганбыз. Тайпалык баскычтан чыкканыбыз бул биздин узак жана талыкпас машыгууларыбыздын жыйынтыгы болду. Биз алдыга коюлган тапшырманы аткара алдык деп ойлойм. Мен гол киргизем деп күткөм, себеби гол киргизүү – бул чабуулчунун милдети. Чынын айтсам, хет-трикти күткөн эмесмин, бирок менин командалаштарымдын көмөгү менен Филиппиндин дарбазасына үч гол киргизе алдым.

– Филиппин менен болгон беттеште сиз оюндун негизги каарманы болдуңуз. Оюндан кийин кандай сезимдер болду?

– Албетте, жеңиш үчүн аябай кубандык, команданын жеңишине cалым кошконум үчүн бактылуу болдум. Ал оюнда биз каалаган жыйынтыкты көргөзө алдык. Качан гана жарым чейрек финалга өткөнүбүздү билгенде жалпы командабыз менен бирге майрамдадык. Бизде сөз менен айтып бере алгыс эмоциялар болду. Биринчиден, бул мекенге болгон сыймык, себеби мындай жыйынтык биздин футбол тарыхыбызда алгачкы ирет болду.

– Кытай менен болгон оюнда сизди сындагандар көп болду. Ал оюнда гол киргизүүгө эмне тоскоол болду?

– Мелдеш учурунда машыгуу процессине жана оюнга даярдык көрүү менен гана алек болом. Ал учурда башка нерселер мени кызыктырбайт. Кытай менен болгон оюн жөнөкөй болгон жок, кайсы бир учурларда каршылаш мыкты коргонду, кээ бир жерде ийгилик алар тарапта болду.

– Өлкөбүздүн гимни жаңырып жаткан учурда ырдаганга аракет кылдыңызбы?

– Албетте! Себеби менин өлкөмдүн гимни жаңырып жатпайбы.

– Оюнчулар менен кошо кубанып, кайгырган күйөрмандар жөнүндө кандай пикир айта аласыз?

– Биринчи оюнда эле биз күйөрмандарыбыздын укмуштуудай колдоосун сездик. Ал эми БАЭ менен болгон оюнда күйөрмандарыбыздын колдоолору стадиондун дээрлик көпчүлүк бөлүгүн ээлеген, үй ээлери саналган арабдардыкына караганда күчтүүрөөк сезилди. Мындай колдоо болуп турганда оюндан бир гана ырахат аласың. Ар бир оюндун аягында стадиондо отурган күйөрмандарга барып ыраазычылык билдирип жаттык. Биздин колдоочулар мелдеш учурунда командабыздын 12-оюнчусу боло алышты.

Ал эми бизди мекенибизде тосуп алганы тууралуу айтыштын кажети жок, бардыгын өзүңүздөр көрдүңүздөр. Учурдан пайдаланып өлкөбүзгө ыраазычылык билдиргим келет. Бизге ишенип биз менен чогуу бул жолду басып өткөн ар бир күйөрманга рахмат. Анткени сиздердин колдооңуздар менен гана биз мындай ийгиликтерге жетиштик.

– Балалык чагыңыз тууралуу сөз кылсаңыз, Кара-Балтадан көчүп кетүүгө эмне себеп болду?

– 6 жашымда ата-энем Германияга көчүп кетүү чечимин кабыл алышыптыр. Эмне үчүн андай чечим кабыл алышканы менин эсимде жок. Кыргыз өлкөсүндөгү балалыгым тууралуу элестер аз, бирок көчөдө балдар менен топ тээп убакыт өткөргөнүм эсимде.

– Бала чагыңызда кайсы командага күйөрмандык кылып, кимди кумир тутчу элеңиз?

– 10 жашымдан баштап футбол менен машыга баштагам. Мюнхендик “Баварияга” күйөрман болчумун. Ал учурда кумирим жок болчу. Өспүрүм куракта Златан Ибрагимович менен Криштиану Роналдунун оюндарына баа берип, саресеп салып баштадым.

– Кээ бир адамдар сиз боюнча Германиянын курамасына ойноого мүмкүнчүлүгү болбогон соң Кыргыз өлкөсү үчүн ойноону чечсе керек деген пикирлерди айтышты...

– Менин алдымда эч качан мындай тандоо болгон эмес. Мен өзүмө жаккан иш менен алектенем, өзүмө ылайыктуу болгон командада ойнойм. Кыргыз улуттук курамасына ойноо сунушу түшкөндө мен ойлонбой туруп эле макулдугумду бергем. Себеби туулуп-өскөн өлкөңдүн намысын коргоп, желегин желбиретүү – бул чоң сыймык жана кубаныч.

– Сизде Германиянын жогорку лигаларында ойноого мүмкүнчүлүктөр барбы?

– Германияда футбол абдан өнүккөн, ар бир лигада клубдар арасында атаандаштык күчтүү. Ошондуктан клуб кайсы лигада ойногону анын деңгээлин көргөзбөйт. Мисалы, өткөн жылдын август айында Германия кубогунун алкагында биз Бундеслигада ойногон Айнтрахт (Франкфурт) командасы менен ойнодук. Ал оюнда биз 2:1 эсебинде жеңип алганбыз, бир голун мен киргизгем. Жогорку лигада ойноо мүмкүнчүлүгү тууралуу сөз кылганда ушу нерсени унутпоо керек. Мүмкүнчүлүктөр дайыма бар, убакыт көргөзөт.

– Улуттук курамада 19-катар саны менен оюн алып барасыз, эмне үчүн бул санды тандап алгансыз?

– Мен клубда 29-катар саны менен ойнойм, себеби апамдын туулган күнү 29у, кайсы ай экенин айтпай эле коёюн. 2015-жылы улуттук курамга кошулганда 19-номерди алдым, жөн гана жакканы үчүн. Бирок формадагы номер мен үчүн чечүүчү мааниге ээ эмес. Жакшы оюн көргөзүү менен командага пайда алып келүү маанилүү.

– Өлкөбүздө сиздин көптөгөн фанаттарыңыз пайда болду. Көпчүлүк кыздар сиздин жылмаюуңузга ашык. Өмүрлүк жарыңызды Кыргыз жеринен издеп көрүүнү ойлодуңуз беле?

– Тилекке каршы, мен Кыргыз жерине келгенде оюндар, машыгуулар менен жүрүп, бош убактым дээрлик болбойт. Бирок келечектеги түбөлүк жарым кыргыз кызы болуп калышы мүмкүн деген вариантты жокко чыгарбайм. Анткени биздин кыздар абдан сулуу.

– Анда суроону улай эле сизге кандай кыздар жагат?

– Менин келечектеги жубайым тууралуу так элестер жок. Бирок ал ак көңүл, мүнөзү жакшы, аны менен чогуу тамашалашып, бири-бирибизди түшүнө билгидей кыз болушу керек.

– Карьераңызды жыйынтыктагандан кийин өзүңүздүн келечегиңизди кандай элестетесиз?

– Үй-бүлөм менен, балдарым жана келинчегим менен чогуу жүргөнүмдү элестетем. Бакчада мангалдын жанында шишкебек бышырып жаткан бактылуу адам катары элестетем (күлүп).

– Футбол талаасында да, жеке жашооңузда да дайыма ийгиликтер болсун!

Маек Кыргыз Республикасынын Футбол федерациясынын басма сөз кызматынын жардамы менен уюштурулду.

КЫСКА-НУСКА

– Твиттер же Инстаграм?

– Твиттер.

– Квартира же шаар четиндеги үй?

– Шаар четиндеги үй.

– Мышык же ит?

– Ит.

– Тамак жасаганды билесизби?

– Ооба.

– Сүйүктүү шаарыңыз?

–Ульм.

– Сүйүктүү тамагыңыз?

– Чүчпара.

Азыркы учурда кулагыңызда кайсы ыр жаңырып жатат?

– Крошка моя, я по тебе скучаю… ("Руки Вверх!")


– Голливуд актрисаларынан кимди жолугушууга чакырмаксыз?

– Анжелина Жолини.

– Кандай супер күчкө ээ болгуңуз келет?
– Учууну каалайт элем.


"Командалаштарымдын көмөгү менен Филиппиндин дарбазасына үч гол киргизе алдым".

Кубан Жумамидинов
sport@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Комментарийлер (10)
interpol
2019-02-12 09:27:32
Азаматсың үлгү алса болчүдай. Намыска жарадаң бар бол Витя.
+6
monster_high_98
2019-02-12 11:30:11
Кыргыз эле жигитинин интервьюсун окугандай болдум
+5
Fedorov
2019-02-12 14:29:54
Ильзат Ахметов оң кулагың, сол кулагың менен да угуп ал. Витянын жарымына да жетпейсиң.
+11
expert.007
2019-02-16 22:45:14
Fedorov, Ильзат биздин курама менен ойногондо ийгилике жете албайт себеи бизде колдоо жок. А Ильзат болсо лидер эмес
+2
Zhiidegul_Abdinazarova
2019-02-12 22:10:44
Супер! Кыргызстанда 6 жашка чейин эле жүргөн болсо да, өзүн Кыргызстанда өстүм деп айтканы жана "Албетте, менин өлкөмдүн гимни жаңырып жатпайбы" дегени өтө таасирлентти. Азамат
+8
FC-Abdish-ata
2019-02-14 12:56:26
Майлисай шаарынан дагы бир озбек бала бар Европада ойнойт, ошону дагы чыкырып корушбобтур, телевизор или интернетен уккам. Бирок по любому Узбектигин кылса керек Илзат Ахмедовко окшоп, Супер Инфо сураштырып коргуло
0
admin_portal
2019-02-14 13:23:54
FC-Abdish-ata, саламатсызбы! Сунушуңузга рахмат, тиешелүү бөлүмгө жеткирилди.
0
Chopa_ta.samaya
2019-02-15 11:13:02
Ыйлагын келет го тим эле.. Азамат жигит экенсин, ушул макаланы окуган канчалаган адамдын журогун жылыттын, бар бол коп жаша, тилектерин орундалсын.
+2
erjigit-e.15
2019-02-15 11:20:01
Виталий Азаматсын!!!
+1
Karasuu27
2019-02-16 16:25:06
ВИТАЛЮКС красавчик
0
№ 849, 8-14-февраль, 2019-жыл
БАШКЫ БЕТ
СОҢКУ КАБАР
СУПЕР-ИНФО
SUPER.KG ВИДЕО
МЕДИА-ПОРТАЛ
Кинозал
ЖЫЛНААМА
Суперстан