Бастанын гитаристи, музыкант Николай Сарабьянов Кожомкул атындагы Спорт сарайынын мышык ыйлай турган абалын концерт баштала электе телефонго тартып алып, Инстаграмдагы баракчасына жүктөдү. Видеодон булгаарысы сыйрылган, жешилген орундуктарды көрсө болот. Ошондой эле Сарабьяновдун “Бишкек шаары. Убакыт машинасы менен 30 жыл мурунку заманга түшүп калгандай болдук” дегенин угууга болот. Орус музыкантынын бул видеосу коомчулукта кызуу талкуу жаратып, Кыргыз жеринде коррупция күч алып, мындан улам Спорт ордосу, "Спартак" стадиону өңдүү маданий-спорттук жайлар оңдолбой жатканы, ушундан улам чет элдик музыканттарга, спортчуларга уят болуп жатканыбыз талкуу болууда. Жаштар иштери, дене тарбия жана спорт агенттигинин коомчулук менен байланыш бөлүмүнүн башчысы Нурдин Султамбаев Спорт ордосун оңдоо үчүн ири суммадагы акча керек экендигин, учурда демөөрчү изделип жатканын жарыялады.