Жылдыздар турмушунан
2009-жылдын март айында Урмат менен Нелянын тоюнда Акбар Сүйүнбаев “эх, мен да ушулардай болуп, жүзүмдөн бакыттын нуру себелеген улуу күндү качан өткөрөм?” деп тамшанып калган эле. Анда Акбар күйөө жолдоштун милдетин аткарган. Жакшылыктын эрте-кечи жок демекчи, ырчынын ошондогу эңсегени бүгүн аткарылып отурат. Акбар ди-джей Кундуз Казыбек кызы менен баш кошту.
БИШКЕКТЕН БАШТАЛЫП, КОЧКОРГО УЗАГАН ТОЙ
21-октябрь күнү таң эрте Акбардын телефону чырылдады...
Канат Бегалиев: – “Салам, сага бир нерсе айтайын дедим эле”.
Акбар: – “Тоюңа келе албайм дебечи”.
Канат: – “Жок. Билесиңби, бүгүнкү жааган карга маанайыңды түшүрүп, кайгырба. Кардын ар бүртүгүн периштелердин ак тилеги деп түшүн”.
Акбардын маанайы түшүп турганда мындай коңгуроо кадыресе көңүлүн көтөрдү.
Той Бишкекте эмес, Акбардын кичи мекени Кочкордо болду. Агам деп жакшы сүйлөшкөн саясатчы Нурлан Мотуев, ырчы Съездбек Искеналиев Бишкектен эки жашка каалоо-тилектерин айтып узатышты. Акбардын мен-мен деген популярдуу ырчы достору жана келинчегинин курбулары болуп Кочкорду көздөй жол тартышты.
Күйөө жолдоштун милдети ырчы Арсенге, ал эми колуктунун курбусунун ролу шакылдаган ди-джей кыз Гүлназ Бакир кызына жүктөлүптүр. Ал да маал-маал Кундуздун көйнөгүн түзөп, кулагына шыбырап, курбусунун жанынан карыш жылбады.
Тойдун аягында салтка айлангандай үйлөнүү тоюнун торту аукционго коюлду. Ошентип, торт Акбардын өкүл атасы Таалай менен шоу-бизнес өкүлдөрүнүн талашында калды. Баштапкы баасы 500 сомдон старт алып, акырында тортту өкүл ата 20 000 сомго сатып алды.
Бул той Кочкор элинин тарыхында кала турган той болду. Кечки 19:00до башталган той түнкү саат үчтөрдө аяктады.
Бактыгүл Сокушова
star@super.kg