Рамин: «САМОЗВАНЕЦ» деген сөздөрдү угуп КАПА БОЛОМ»

“Танхам” деген ыр менен жаштар ооруп, жерди теше бийлеп калышты акыркы кезде. Аны ирандык Рамин Монтазери деген ырчы ырдайт деп билсеңиздер керек. Ошол жигиттин Кыргызстанга келип иштеп калганына эки жылга аяк басты. Шоу-бизнес чөйрөсүндө «бул ирандык ырчынын атын жамынып жүргөн эле бирөө» деген кептер айтылууда. Мындан улам чындыгында эле ирандык Рамин аттуу ырчы бизге келип иштеп жүрөбү же атын жамынган бирөөбү, ошону изилдеп көрөлү дедик. Күмөн санаган суроолор көп болгондуктан, ырчы жигит бизди ырдап ишендиргенге аракет кылды...

Толук аты-жөнү – Расул Хейр Абади
Сахнадагы лакап аты – Рамин Р.К. (Р.К. ата-энесинин ысымынын баш тамгаларынан алынган)
Туулган жери – Иран, Мешхед шаары
Туулган жылы – 1989-жыл, 10-декабрь
Репертуарында – 10 ыры, 1 клиби бар
Атак алып келген ыры – “Танхам”

– Куш келипсиң, Рамин. Кепти Кыргызстанга келип калышыңдан баштасак...
– Рахмат. Атам бизнесине байланыштуу көптөн бери Кыргызстанда. Мен дагы 5 жылдан бери жайында келип-кетип жүрчүмүн. Иранда ырчы болсоң дүкөндөргө кенен кирип, көчөдө басып жүрө албайсың. Чыктың дегиче таанып, жүдөтүшөт. Ошондуктан сиздерге кенен басып жүрүш үчүн келдим (күлүп). Анан Ислам Сатаров Иран элчилиги аркылуу мага байланышка чыгып “эмне аракет кылбайсың? Кыргызстанга келип иштебейсиңби?” деп калды. Ошентип иштешип калдык.

– Эмне үчүн дал Кыргызстанды тандадың?
– Бизде, Иранда ырчы болуп көтөрүлүш абдан кыйын. Мага окшогон ырчылар абдан көп, күндө бир жаңы ырчы чыгып турат десе да болот. Алардын арасынан чыга албай да каласың. Кыргызстанда болсо көтөрүлүш оңой, кала берсе менин стилимде ырдагандар жокко эсе экен.

– “Танхам” ырың кайдан жаралып калды эле?
– Кичинекей кезден эле уккан ырларды кыңылдап ырдап жүрө берчүмүн. Мени менен ырдаган Бибак (рэпер) таанышым болгондуктан, 5 жыл мурун “чогуу ырдабайлыбы?” деп сунуш кылган. Экөөбүз ырдаган ыр минтип хит болуп чыга келди.

– Ырдын мааниси кандай?
– Ырдын мааниси жалгыздык тууралуу. “Мен эми жалгыз калдым...” деп зарлаган жигиттин арманы.

– А бирок клипте ырдаган жигит сен эмессиң го?
– Ошол ыр Иранда хит боло баштаганда мен Кыргызстанга келе бергем. Бул жакта жүргөнүмдө Бибак “клип тарталы” деп калды. Шартка байланыштуу бара албай калгандыктан, ал менин уруксатымсыз эле башка бирөөнү ырдатып клип тартып салыптыр.

– Анан унчукпай кала бердиңби? Атыңды чыгарган ырга башка бирөөнүн жүзү менен клип тартылып жатса...
– Чынында, атам менин ырдаганыма каршы. Кыргызстанга келсем, “буларда ырчыларды өлтүрүп кетет экен” деп (Микаэлден кийин) аябай чочулаган. Ошого байланыштуу унчукпай кала бердим.

– Анда менин ырым деп кантип далилдей аласың?
– Иранда ырдоого уруксат алуу көп маселе жаратат. Андыктан чыныгы атым менен эмес, Рамин Монтазери деген лакап ат менен чыккам. Ал эми паспортто өз атым – Расул Хейр Абади.

– Паспортуңда атың башка, клипте башка жүз болсо, анда чын эле ишенбөөчүлүк жаралат экен...
– Кээде “самозванец” деген сөздөрдү угуп алып аябай капа болом, ырдагым да келбей калат. Ырчымын деп мактангым келбейт. Бирок ирандыктардын ар кандай кечелери болгондо мени чакырып, автограф сурашат...

– Клипте сен болбосоң, жүзүңдү кайдан таанышат?
– Иранда ырчылар бул жактагыдай көп деле клип тартып, концерт коюш керек деп умтулушпайт. Ал ырдаган ырлар, сүрөттөрү интернет барактарына тарап, ошол аркылуу эле таанып калышат.

– Фонограмма менен ырдайсыңбы?
– Мен канча корпоративдик кечелерге, тойлорго барып жатам, баарында жандуу ырдадым. Жадакалса ырдын сөзү жок музыкасын коюшса деле сөзсүз үстүнөн жандуу аткарам.

– Ислам Сатаров менен иштешкениңе канча болду? Ортодо келишим барбы?
– Ооба. Эки жылдык келишим менен иштешебиз, продюсерге 40, мага 60 пайызы калат, түшкөн сумманын. Келип жашап калганыма бир жылдан ашты, ар кандай кечелерге көп чакыра башташты.

– Жаңы клип тартыптырсың “Танхамга”. Эмне үчүн башынан тартпай өзүңчө тартып, анан Бибактыкын мурунку клиптен кыркып кошуп койдуң? Макулдашып чогуу тартсаңар болбойт беле?
– Ырдын автору катары менин да укугум бар. Башында Бибак да менин уруксатымсыз клип тартып, башка ырчыны ырдатып чыгарып салды. Жиним келгени менен, унчуккан эмесмин. Эми ушинтип мен да өз алдымча тартайын деп чечтим.

– Клиптин бул версиясы тууралуу анын маалыматы барбы?
– Жок, анын кабары жок.

«АЛ ЭЛДИ АЛДАП ЖҮРӨТ»

Шоу чөйрөдө “Рамин чыныгы Рамин эмес” деп ишенбей жүргөн ырчы жигиттерге кайрылдык.

Данияр Эрматов, ырчы:
– “Танхам” деген ыр жаңы чыкканда жата калып укчу элем, ошол ыр менен “ооругам” десем болот. Анан эле “Ирандан Рамин келди” десе аябай ишенип, сүйүнүп жүргөн элем. Ойлогом, “Дискотека Авария” сыяктуу бир күнгө келип ырдап, кайра кетип калат деп. Бирок андан бери бир күн эмес, бир жыл өттү, бул ырчы дагы деле Кыргызстандан кетпей жүргөнү чоң күмөн жаратат. Менин далилдерим болбосо да, ал эмес деп ойлойм. Кантип эле Ирандан келип, бир жыл бою башка өлкөдө майда-чүйдө кечелерде ырдап жүрүп алсын, атактуу Рамин аттуу ырчы?

Акбар Сүйүнбаев, ырчы:
– Мен бул жигитти “Танхамды” ырдаган Рамин деп эсептебейм. Бул жөн гана ошол ырчынын атын жамынып жүргөн адам болсо керек. Той, корпоративдик кечелерге да барып жүрөт экен. Бир жолу кечеден кийин таанышып, сүйлөшүп калганбыз. Жүз көрүшүп, баарлашкан соң адамды билип каласың го, ким жана кандай адам экенин. Менде ошондон тартып чоң күмөн жарала баштады, бул жигит тууралуу. Жадакалса көп кечелерде фонограмма менен ырдап жүргөнүн билем. Кийинчерээк өз үнү менен ырдаганын да уктум. Радиодон берилип жаткан "Танхамга" мунун үнү такыр окшошпойт. “Танхамды” ырдаган бул жигит экенине ишенбей турам. Ал жөн гана элди алдап жүрөт. Так далилдерим жок, албетте.

“Танхам” ыры "Тумар" радиосу аркылуу элге тарап, хит болгонуна байланыштуу алардан ыр тууралуу маалымат алдык.
Алексей Сидоров, “Тумар” радиосунун жетекчиси:
– Бул ырды биз интернеттен угуп, жагып калгандыктан коюп баштаганбыз. Жаштардын табитине туура келди окшойт, былтыр жай мезгилинде чыккандан тарта хитке айланды. Раминдин интернеттен сүрөттөрүн көргөнүм эле болбосо, бул жигит менен таанышып, сүйлөшүп көргөн эмесмин.

Гүлжамал Бөрүкулова
star@super.kg

 Кыстарылган видео