Нурайым Азыкбаева:«КҮЧТҮҮ АЯЛМЫН, КЫЗЫМДЫ АТАСЫЗ ЧОҢОЙТО АЛАМ»

Таланттуу атанын кызы Нурайым Азыкбаева кыл кыякта ойносо дүйнө укмуш бир кереметке айланып кетет. Жансыз аспапка жан киргизген айымдын ырчылык өнөрү да күч. Бирок ырчы айым «чыгармачылык менен үй-бүлөнү чогуу алып кетүүгө адамдын күчү да, шарты да, эрки да жетпейт экен» дейт. Дегеним, мындан 2 жыл мурун турмуш жолуна аттанган Нурайым бир жылга жетпей ажырашып кеткен. Анткен менен Арууке аттуу наристенин энеси экенине бактылуу.

– Нурайым, ажырашып кеткениң тууралуу укканыбызга көп болду. Бирок сенин тынчыңды алгыбыз келген жок...
– Кош бойлуу айымдын жанында жолдошу болсо телегейи тегиз, жан дүйнөсү тынч деп ойлойм. Тилекке каршы, мындай жагдай менин маңдайыма жазылбаптыр. Өзүмө келип, өткөн күндөрүмдү унутуп баратканыма жарым жылдан ашык убакыт болду окшойт. Сүйгөн кесибим бул азаптан мени сууруп чыкты. Ошол эле той, концерт, чет өлкөлөргө гастроль, баары мени алаксытты. Жакшы музыка уксам, ырдасам, эч кандай маселени ойлобой, ошол ыргак менен жашап калам.

– Сүрөттөрдөн бактылуу жүзүңдү көрүп, жолдошуң экөөңдү жакшы түгөйлөрдөн болот деп койдук эле, эмне болуп кетти?
– Сүрөттөрүбүздү көргөндөрдүн баары эле «бири-бириңерге түгөй эмес болчусуңар» деп жатышат. Очогубуздун урашына жашоого болгон көз карашыбыздын төп келбегени себеп болду. Мен чыгармачыл адаммын, ал башка кесиптин ээси, менин үй-бүлөм чыгармачыл адамдар, аныкы башка чөйрө. Ошону менен келише албай калдык. Ушундай тагдырды башыман өткөргөнүмө өкүнгөн жокмун, тескерисинче, кубанычтамын. Анткени жашоо оңой эмес экенин түшүндүм. Негизи, Кудай адамдын күчүнө жараша сыноо берет деп коёт. Мен күчтүү аялзатымын. Мага оңой-олтоң сыноо келген жок. Мен ал сыноону татыктуу жеңип чыктым.

– Кыз-жигит катары сүйлөшүп эле үйлөнбөдүңөр беле, ал сенин ырчы экениңди, гастролго чыгарыңды билген да?
– Ооба, эки жыл бири-бирибизди жакшы эле тааныгандай болгонбуз, «чыгармачылыгыңды колдойм» деп сөз жүзүндө айтканы менен, башка түшкөндө көтөрүү кыйын экен. Аны да түшүнүү керек, аты чыккан үй-бүлөнүн аты чыккан кызы менен жашаш чын эле татаал. Бирок биз айрымдардай болуп урушуп-талашкан жокпуз. Жай отуруп баарын талкуулап, ойлорубузду ортого салдык. Ал «чыгармачылыгыңды түшүнөм, бирок мен сенин гастролго, тойго, концерттерге кетип кала беришиңе чыдай албайм» деди. Ага үй оокаты менен алышкан аял керек экен. А мен издендим, ырдайм, музыка жаратам дедим. Анткени Нурайым Азыкбаева – атамдын, апамдын жана менин эмгегимдин аркасында түптөлгөн ысым. Кээ бирөөлөр «үй-бүлөнү да, сахнаны да алып кетсе болмок» деши мүмкүн. Эч качан экөө айкалышпайт. Бирдей алып кетүү мүмкүн эмес. Сөзсүз бирөө аксайт экен. Анан мен дагы мени колдой турган адам керек дедим. Экөөбүз тең ушундай бүтүмгө келдик. Ата-энелерибиз, албетте, жаман болушту, «силер үйлөнөбүз дедиңер, бул чоң адамдардын чечими деп макул болдук. Эми ажырашабыз деп жатасыңар, эгер мындай чечимди экөөңөр тең туура деп тапсаңар, биз эмне дейбиз» дешти. Негизи куда-кудагыйлар абдан сый болушчу.

– Атасы кызын келип көрдүбү?
– Албетте, келип көрдү, сүйүндү. Балада эмне күнөө? Мукай азыр үйлөнгөн, алектенчү иши, көңүл бурчу адамдары бар. Мага келип «үйлөнгөнү жатам» деп айткан. Мен угуп алып сүйүндүм. Бакыт кааладым.

– Кайын журтуң менен пикир келишпестик болду беле?
– Кайын журт менен жакшы мамиледемин. Чет өлкөгө чыкканда дайыма белек-бечкек менен келчүмүн. Азыр да сүйлөшүп турабыз.

– «Атасы тез-тезден гастролго алып кетчү» деген кептин чындыгы барбы?
– Биринчиден, атам мени эч качан гастролго алып кете албайт, мен атамды алып кетишим мүмкүн. Анткени беш жылдан бери «Эне-Сай» тобунун көркөм жетекчиси менмин. Административдик иштердин баары менин моюнумда. Чакырууларды да өзүм кабыл алам. Тескерисинче, мен атама телефон чалып, «бул күндөрү тиякка барабыз, эч кандай жумуш менен алектенбеңиз, даяр туруңуз» деп алдын ала эскертем. Турмушка чыккандан кийин атам мени үйдөн алып кетмек тургай ашыкча телефон чалгандан тартынчу.

– Турмушка чыккандан кийин гастролго көп чыктың беле?
– Мен турмушка күзүндө чыктым да, чын эле гастроль, той-топур көп болгон.

– Кызым атасыз өсүп калса кандай болот деп коркпойсуңбу?
– Колуман баары келет, үй жумуштарын жасоодо камчы салдырбайм, Кудай берген талантым бар, акчасыз да калбайм. Колдогон ата-энем, бир туугандарым турат. Жакында батир алайын деп жатам. Эч нерседен коркпойм, мен күчтүү аялзатымын.

– Кызың жөнүндө айтып берсең, кимге окшош?
– Кызымдын аты Арууке, 1 жаш жети айга толду. Аябай тентек, мага, таятасына окшош. Азыр чуркап жүрөт.

– Гастролго чыкканда Аруукени ким карап калат?
– Үйдө менин тарбиямды көргөн туугандарыбыздын кызы бар. Ошол сиңдим же апам карайт.

– Эми турмушка чыксаң жигиттин эмнесине көңүл бөлөсүң?
– Бир турмуш көрүп калгандан кийин, албетте, мурункудай баш жоготуп сүйбөйсүң. Жашоонун ачуу-таттуусун сезип калган соң өзүмө окшогон токтолуп калган жигитти карасам керек. Чынын айтсам, ал жөнүндө ойлой элекмин, убактым да жок, анын үстүнө аны ойлоого эрте. Азырынча 1-орунда кызым жана чыгармачылыгым.

– Берлинге барып келдиң окшойт, ошол туурасында айтып берсең?
– Берлинге Нооруз майрамына карата болгон эл аралык фестивалга барып келдик. Ар бир мамлекет өзүнүн улуттук кийимин, тамак-ашын, ырын, бийин көрсөттү. Башка өлкөлөрдөн 40-50гө чукул адам барышса, бизден мен, атам, байкем үчөөбүз бардык. Бул дагы каражатка келип такалат, биздин элчилик үчөөбүзгө кеткен чыгымды гана төлөмөй болушту. Көрүүчүлөр бизди 3 сааттан ашык сахнадан кетирбей, өнөрүбүзгө күбө болушту. Андан сырткары элчилик «жай мезгилинде дагы Германияда турне уюштуруп беребиз» дешти. Жаз, классика жанрларындагы чыгармалар ойнолот.

– Учурда эмне менен алексиң?
– Атам «Издейм сени», «Жамгыр төктү» деген ырларды саксофондо ойнойт эмеспи. Менин дагы колумдан келсе керек деп колумдан түшүрбөй үйлөп жатып үйрөнүп алдым. «Бишкек», «Сейилдөө», «Эне-Сай» деген үч чыгарма жаздырдым. Анын бирине клип тартып жатам.

– Чоң рахмат маегиңе, чыгармачылык ийгилик каалайм.

Сүйүн Кулматова
star@super.kg

 Кыстарылган видео