ГҮЛЖИГИТТИН «РЕПЕТИЦИЯСЫ» ЭЛДИН БИЙИ МЕНЕН АЯКТАДЫ

«Кожомкулдун атын алып жүргөн Спорт Ордосунда Гүлжигит Сатыбеков концерт берет» деп уккам. Концерттерден калбаган жаным бардым. Барбай арманда калган окурманга баяндап беришим керек да, эт жебесе да шорпо ичкендей болуп калышсын...

Аталышы – «Репетиция»
Өткөн жери – Кожомкул атындагы Спорт Ордосу
Өткөн күндөрү – 2-3-февраль
Башталышы – 19:10, 19:45 (билетте 18:30)
Көрүүчүлөр – Залдын 99 пайызы
Билет баасы – 400-600 сом

Гүлжигиттин концерти деле салтты бузбай, бир топ кечигип башталды. Бир чети мага жакшы болду. «Сахна кандай жасалган, кимдер келди, угуучулары жаштарбы же улууларбы, тоолуктарбы же шаардыктарбы?» деп байкап көрүүгө мүмкүнчүлүк түзүлдү. Сахнанын дал ортосуна килейген экран коюп, «Гүлжигит Сатыбеков» деп жазып, ырчынын ойлуу түшкөн сүрөтүн бакыйтып чыгарып коюшуптур. Мурун мындайды көрбөгөн элем, сахнанын эки тарабына чоӊ экран коюшкан экен, кымыӊдап алдым. Ананчы, көрүүсү жүз пайызга жетпеген мага окшогондордун баары эле уюштуруучулардын мындай аракетине ыраазы болуп, ошо эки капталдагы экранды тиктеп отурдук. Жарк-журк деген жарыктары бир укмуш, ал эле эмес, Гүлжигиттин бут жагына да экран коюп салышыптыр. Ар кайсы жерде сороюп музыкалык аспаптар, бэк-вокалчыларды микрофон күтүп турганынан «аа, жандуу үн менен ырдашат окшойт» деп ынтаа коюп, күтүп калдым.
Акыры концерт да башталды. Тыныгууларда элдин көӊүлүн ачсын деп «Беш тапан» куудулдар тобун чакырышкан экен, кээде тамашаларын ашыкча созуп салышканы эле болбосо, Рахман Разыковдун «балдары» коюлган милдетти жакшы эле аркалашты. Бэк-вокалчыларга да кызык болуп кетти окшойт, музыканттар кетсе да алар кетпей, ошо микрофондорду кармаган тейинче «Беш тапандын» тамашаларын күзөтүп турушту.
«Муӊдуу ырлардын рыцары» наамын акырындап Асылбек Өзүбековдон тартып алып бараткан Гүлжигит чү дегенде эле жүрөк кылдарын черткен сүйүү азабын баштайбы десем, жок, алгач шаӊдуу, тамашалуу ырларын аткарды. Сахнада гитарачы, барабанчылар менен кошо жата калып, тура калып, атүгүл тердеп чыккан Гүлжигиттин терин аарчый калганга да жетишип, шылдыракчы бирөө жүрдү. Чоӊ экранга чыкканында карасам Токтогулдун тургуну, шылдырак ойноп интернетти «жарган» Кадырбек Мураталиев экен. Ал кызуусуна кирип кеткенде Спорт Ордосунун тээ төрүнө чейин элди аралап кетип жатты.
Тээ бир убакта жанына гитарасы менен Чыӊгыз Турдубековду коштотуп, өзү аккордеонун көтөрүп дагы чыкты Гүлжигит. Бир кайрыкты жакшы эле ойноп, ырдап баштаган сөзүн унутуп кетти окшойт, «бул репетиция, чыныгы концерт эртеӊ болот» деп абалдан чыкты. Буга чейин «Гүлжигит Түркияга барат экен» деп укканым бар эле, ошол үчүн концертин «Репетиция» деп атаган го, даярдык окшойт деп ойлоп койгом. Кийинчерээк ырчы өзү да айтып калды. «Буга чейин чет жактардан көп чакыруулар келди. Аларга дискти чөнтөгүӊө салып эле барып кала албайт экенсиӊ. Ошолордун деӊгээлине туура келчүдөй тасмага түшүрүлгөн мыкты бир концерт керек болду. Ошондуктан атайы «Старики разбойники» деп атап, кыргыздын мыкты музыканттарынан тандап топ түздүк. Эми кыдырып концерт беребиз. Бул жагы Орусия, тигил жагы Түркияга чейин» деди. Концертинин ортосунда сахнаны кайтаруучу эки жигиттин коштоосунда барып апасына гүлдесте берип, «сендей ырчы жигитти кандай аял төрөдү экен», деген сөздү көп угам. Мына, көрүп алгыла, мени төрөп, эрезеге жеткизген ушул кишилер», деп атасы менен энесин элге тааныштырды.
Саат 7ден өтүп башталган концерт түнкү 11ге барып бүттү. Аягында көрүүчүлөр сахнага жакын келип бийлеп, Гүлжигиттин «акыркы ыр» дегенине койбой бир нече ырын ырдатып, куудулдар тамашалагандай «сахнаны чаӊдата» бийлеп, анан тарап кетишти. Менин чыгарган жыйынтыгым, бул жигит өзүн да, келген элдин кулагын да кыйнабай 3 саат бою жандуу үн менен ырдай алат экен.

Толик Сынчы

 Кыстарылган видео