МЫРЗАЛАР ҮЧҮН РЕЦЕПТТЕР: 8-МАРТТЫН ДАСТОРКОНУ

8-Март. Гүлдесте, шоколад, атыр... Албетте, жакшы белек деңизчи, бирок өз колуңуз менен даярдалган даам жакындарыңыздын эсинде узакка калары талашсыз. Сиз үчүн көп эмгекти жана убакытты талап кылбаган даамдардын рецепттерин сунуштайбыз.

ПУДИНГ

Керектелүүчү азыктар:
Сүт – 1 литр
Жумуртка – 2 даана
Кумшекер – 4 аш кашык
Картошка крахмалы – 6 аш кашык
Мөмө-жемиш, жаңгактын түрү – 200 грамм

Даярдоо ыкмасы:
1. Сүттүн жарымын мискейге куюп, кумшекерди кошуп аралаштырып, жай отто кайнатабыз.
2. Башка бир идишке жумуртканын сарысын, крахмалды жана сүттүн жарымын кошуп жакшылап аралаштырабыз.
3. Эми бул аралашманы кайнап жаткан сүткө чуурута куюп, жай аралаштыруу менен дагы 2 мүнөттөй кайнатып, оттон чыгарабыз. Аралашма муздаган соң муздаткычтын тоңдургуч бөлүгүнө 1 саатка салабыз. Пудинг даяр! Пудингди тууралган мөмө-жемиштер, жаңгактын түрлөрү менен кезектештирип бокалга салып дасторконго берсеңиз болот.

БАНАН ДЕСЕРТИ

Керектелүүчү азыктар:
Банан – 2 даана
Шоколад – 100 грамм
Каймак май – 30 грамм
Жыгач же желим таякча – 4 даана

Даярдоо ыкмасы:
1. Банандын кабыгын аарчып, тең ортосунан бөлөбүз. Эми түп жагына таякчаны сайып, муздаткычтын тоңдургуч бөлүгүнө 5-7 мүнөткө салып коёбуз.
2. Шоколадды майда бөлүктөргө бөлөбүз да ага каймак майды кошуп эритип алабыз.
3. Эриген шоколадга бананды малып, глазурдан же майдаланган жаңгактан себелеп, тоңдургучка 10 мүнөткө салабыз. Десерт даяр!

ШИРЕЛҮҮ ТООК ЭТИ

Керектелүүчү азыктар:
Тооктун төш эти – 500 грамм
Болгар калемпири – 1даана
Каймак – 1 чай чыны
Сыр – 50 грамм
Сарымсак – 2 тишче
Татымына жараша туз, мурч

Даярдоо ыкмасы:
1. Тооктун этин аягына жеткирбей тилип, чөнтөкчө жасайбыз да, бир аз туз себелеп тыныктырып коёбуз.
2. Болгар калемпирин тазалап, ичке туурайбыз да, эттин тилинген жерлерине салып чыгабыз.
3. Каймакка майда тууралган сарымсак, сүргүчтөн өткөрүлгөн сыр, татымына жараша туз, мурч кошуп аралаштырабыз.
4. Электр мешинин табасына тоок этин салып, үстүнө каймак соусун куюп, 180 градуста 40 мүнөт бышырып алабыз.

Дамира Арстанова
kenesh@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Комментарийлер (4)

sasik

2018-03-06 14:15:59

8-март аты эле аялдардын майрамы болбосо эле кобунчо эркектер майрамдашат.Эч кандай десерттин деле кереги жок эле мага,жок дегенде ушул куну эртэрээк келсе жакшы болмок

+10

AIZAD

2018-03-07 01:13:20

sasik,ичпей, майрамдабай десениз. Ооба, мен да кошулам сизге!

jemile

2018-03-06 17:12:47

Муну жасабай эле кайра, "бүгүн майрамга эмне тамак жасайсың?" , дешсе керек

+10

Sapar.Samar.Sara.

2018-03-07 17:18:18

jemile,туура айтасыз)))

Комментарий калтыруу үчүн өз ысымыңыз менен кириңиз же каттоодон өтүңүз.

№ 800, 2-март -8-март, 2018-ж.