БИР БҮРКҮМ. НАРЫНДА 3 МИҢДЕЙ ИТКЕ ПАСПОРТ БЕРИЛДИ...

Маданият, маалымат жана туризм министрлигинин алдындагы Маалымат жана массалык коммуникациялар департаментинин директорлугуна Салкын Сарногоева дайындалды.
Курман айт майрамы 10 же 11-августта белгиленери болжолдонууда. Бул тууралуу мусулмандар дин башкармалыгы билдирди.
Кыргыз өлкөсүнүн зыяратчылары 16-июлдан тарта Меккеге ажылыкка жөнөтүлүп баштайт.
Сооронбай Жээнбековдун кеңешчиси Айбек Азыранкулов отставкага кетип, экс-президент Алмазбек Атамбаевди колдой турганын жарыялады.
Чүй облусунун Токмок шаарында үйлөнүү тойдо 90дой адам ууланды. Бул тууралуу Саламаттыкты сактоо министрлигинин басма сөз кызматы билдирди.
2018-жылы Кыргыз өлкөсүндө сот тутуму ата-энелик укуктан ажыратууга байланыштуу 738 ишти караган. Анын алкагында 308 жаран аталык, 128 жаран энелик укуктан ажыратылган.
Адам укугун коргогон эл аралык сегиз уюм Евробиримдиктин тышкы саясат жана коопсуздук боюнча жогорку комиссары Федерика Могериниге кайрылуу жолдоп, Азимжан Аскаровду эркиндикке чыгаруу маселесин көтөрүштү.
Нарын облусунун Ат-Башы районунда 2019-жылга карата район боюнча каттоого алынган 2843 итке паспорт берилди.
Өзгөчө кырдаалдар министрлиги билдиргендей, Кыргыз Республикасында 2019-жылдын башынан бери 57 адам сууга чөгүп каза болду. Анын ичинен 18 адам 12 жашка чейинки балдар, 12си өспүрүмдөр.
Эмгек жана социалдык өнүгүү министрлиги жаңы төрөлгөн ымыркайларга сүйүнчү пул эки күн ичинде берилерин билдирди. Эми сүйүнчү пулду алуу үчүн төрөгөн аялдын паспорту менен баланын туулгандыгы тууралуу күбөлүгү гана жетиштүү.
Орусияда жеке ишкер Камчыбек Каримовду атып кетип, ал каза болду.
Бир жылда президент парламент кабыл алган 2 мыйзамга кол койбой, артка кайтарганын спикер Дастан Жумабеков билдирди.
УКМК: Икрамжан Илмияновдун иши сотко жөнөтүлдү.
Улуу Британия жана Түндүк Ирландиянын Кыргызстандагы жаңы элчиси болуп Чарльз Гаррет дайындалды. Бул тууралуу ТИМ маалымдайт.

Кубан Жумамидинов
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 870, 4-июль - 10-июль, 2019-жыл