Дүйнөлүк бокс серияларында жердешибиз Өмүрбек Малабеков биринчи беттешинде утулуп калды

27-февралда Дүйнөлүк бокс серияларында “Украиналык атамандар” клубу Куба өлкөсүнүн командасы менен беттешти. Командалык тирештин алкагында 2 команданын 5тен мушкери беттешип, жыйынтыгында кубалыктар 5 беттештин үчөөсүндө утуп чыгышты. Анда украиналык клубдун намысын 56 килограмм салмакта жердешибиз Өмүрбек Малабеков талашты. Ал атаандашы Энди Круз Гомезге упай катыштыгында уттуруп жиберди. 3 калыс бир добуштан жеңишти кубалык мушкерге ыйгарышты (47:48, 47:48, 46:48).

Кошумчалай кетсек, Бүткүл дүйнөлүк бокс сериясы – жарым профессионалдык клубдар арасындагы ири мелдеш. Мелдештин бул сезонуна 16 клуб катышууда. Мелдештеги “Украиналык атамандар” клубунун курамына Ө.Малабеков быйыл кошулду. Мелдештин жыйынтыгына карап 10 салмак категориясында “Рио-де-Жанейро-2016” Олимпиадасына жолдомо ойнотулат.

Автор: Максат Кудайбердиев