Чемпиондор Лигасында “Реал” жана “Ювентус” клубдары жарым финалга чыгышты

Мадриддик “Реал” жана туриндик “Ювентус” клубдары УЕФАнын Чемпиондор Лигасынын жарым финалына чыгышты. Бул тууралуу мелдештин расмий сайты кабарлайт.

Маалыматка ылайык, чейрек финалдын жооптук оюнунда “Реал” өз үйүндө “Атлетико” клубун утуп алды. Беттештеги жалгыз голду 88-мүнөттө мексикалык чабуулчу Хавьер Эрнандес киргизди. 1 апта мурун өткөн алгачкы оюнда 0:0 эсеби катталганын эске алганда, 2 оюндун жыйынтыгында “Реал” жарым финалга чыкты.

Ал эми экинчи жарым финалдык жолдомону камсыздаган “Ювентус” клубу конокто “Монако” менен 0:0 эсебинде тең ойноду. Өз үйүндө 1:0 эсебинде жеңишке жетишкен туриндиктер жарым финалдык жолдомого ээ болушту.

Кошумчалай кетсек, жарым финалдык оюндар үчүн чүчү кулак 24-апрелде ташталат. Алгачкы жарым финалдык оюндар 5-6 майда, жооптук оюндар 12-13-майда болот. Ал эми финал 6-июнда Берлин шаарында орун алат.

Автор: Максат Кудайбердиев