Нарын облусунда сел жүрүп, боз үйдү жана чатырды агызып кетти

Нарын облусунда сел жүрүп, боз үйдү жана чатырды агызып кетти. Бул тууралуу Өзгөчө кырдаалдар министрлигинин басма сөз кызматы 30-июнда билдирди.

Маалыматка караганда, Ак-Талаа районунун Ак-Чий айылында 29-июнда 20 мүнөткө созулган нөшөрлөгөн жамгырдын кесепетинен айылдын түндүк-батыш тарабындагы Шаркыратма-Ноосу коктусунан келип түшкөн кыян суулары коктунун оозунда жайгашкан 1 турак жайды короосу жана сарайы менен каптап кеткен. Ошондой эле айылдын түндүк-батыш тарабындагы Баетов-Макмал унаа жолунун суу өтүүчү түтүгүнө жогорудан келген кыян суулары батпай түтүктөн ашып, унаа жолду бойлой жайгашкан 1 боз үйдү (70 баш) жана 1 чатырын (10 адамдык) эмеректери менен, балдар ойногон аянтта орнотулган курулмаларды агызып кеткен. Унаа жолго жана түтүккө зыян келген эмес.

Жарандык коргонуу комиссиясы тактоо иштерин жүргүзүүдө. Учурда ЖЭМ-15 ишканасынан 1 бульдозер, 1 грейдер кезметте турат. Адам өмүрүнө жана мал-жандыктарга зыян келтирилген эмес.

Автор: Айпери Ганыжан кызы