Бишкекте Улуттук гвардиянын күнүнө карата спорттук иш-чаралар өтөт

Улуттук гвардиянын түзүлгөндүгүнүн 23 жылдыгына карата 16-18-июль күндөрү Бишкек шаарындагы 714-аскер бөлүгүндө спорттук иш-чаралардын алкагында күжүрмөн самбо боюнча мелдеш өтөт.

Куралдуу күчтөрдүн кошуун жана бөлүктөрүнүн, ошондой эле күч түзүмдөрүнүн командаларынын арасында өтүүчү мелдеште Жалал-Абад облустук ички иштер башкармалыгындагы "Динамо" командасынын спортчулары өз күчтөрүн сынашат. Бул тууралуу 15-июлда Жалал-Абад ОИИБинен билдиришти.

Самбо боюнча быйыл Кыргыз Республикасынын чемпиондугу жана ИИМдин биринчилиги Жалал-Абад аймагында өткөн.

Айта кетсек, Улуттук гвардия 1991-жылдын 3-декабрында түзүлгөн. 1992-жылдын 20-июлунда гвардияга алгачкы аскердик чакыруу болуп, анда 300 жоокер ант берген. Бул күн Улуттук гвардиянын күнү деп жарыяланган.

Автор: Айпери Ганыжан кызы