Маалымат жыйынында "коррупцияга тиешеси бар" делген Зепп Блаттерге шылдың иретинде тутам-тутам акчалар чачылды

Эл аралык футбол федерациясынын (ФИФА) Аткаруу комитети аталган федерациянын жаңы президентин 2016-жылдын 26-февралында шайлай турганын жар салды. Мындай чечим кезексиз отурумдун жүрүшүндө кабыл алынганын аталган уюмдан кабарлашты.

Маалым болгондой, отурумдан соң ФИФАнын президенти Йозеф Блаттердин катышуусунда маалымат жыйыны орун алды. Ал жыйынга киргенде британиялык күлкү жаратуучу Ли Нельсон эл алдына чыгып, Блаттерди көздөй тутам-тутам жасалма акчаларды чачып жиберди. Анын бул кылыгын “Бул акчаларды 2026-жылы Дүйнө чемпиондугун Түндүк Кореяда өткөрүү үчүн ал” деген сөздөр коштоду. ФИФАнын президенти ыңгайсыз абалда калып, залдан чыгып кетүүгө мажбур болду. Учурда ири басылмалар бул кылык Блаттерге коррупцияга катыштыгы бар экенин эскертүү иретинде жасалганын айтышууда.

Автор: Максат Кудайбердиев