Бишкектин тургуну 1 жылдан бери мурунку күйөөсүнөн кызын ала албай жатканын айтууда

Бишкектин тургуну Жайнагүл Кожогулова 1 жылдан бери 2 жашар кызын мурунку күйөөсү Азамат Токтобеков бербей жатканын айтып акыйкатчыга арыз менен кайрылды. Жабырлануучу кайненеси Дилде Тезекбаева менен мурунку күйөөсү кызын Ош облусунун Кара-Кулжа районуна караштуу Тоготой айылында мыйзамсыз алып жүрүшкөнүн айтууда.

"Жабырлануучу өзүнүн туугандары менен Тоготой айылына барышканда алар баланы берүүдөн, ал тургай аны көрсөтүүдөн баш тартышкан. Бул боюнча Кара-Кулжа райондук ички иштер башкармалыгына бир нече жолу арыз менен кайрылып, бирок укук коргоо кызматкерлери анын арызын кабыл албай коюшкан. Акыйкатчы институту маселени чечүүгө көмөктөшүү боюнча Кара-Кулжа райондук үй-бүлөнү жана балдарды социалдык колдоо башкармалыгынын жетекчиси Ж.Шариповго кабар жиберди",- деп билдирет мекеме.

Акыйкатчы институту кызды апасына кайтарып берүүгө жана бул ишке катышы барларга укуктук баа берүүгө күч жумшай турганы айтылды.

Автор: Автандил Добулбеков