Кыргыз Эл артисти Мукамбет Токтобаевди акыркы сапарга узатуу зыйнаты өтүүдө

Кыргыз искусствосу 30-июлда орду толгус оор жоготууга учурады. 68 жаш курагында күтүлбөгөн кырсыктан Кыргыз Республикасынын Эл артисти, даңазалуу актёр Мукамбет Токтобаев дүйнөдөн кайтты. Ал 1947-жылы 5-майда Ысык-Көл облусунун Жети-Өгүз районуна караштуу Барскоон айылында жарык дүйнөгө келген.

Туулган жеринде орто мектепти аяктаган соң, 1964-1965-жылдары алгачкы чыгармачылык жолун Балыкчы шаарынын Маданият үйүндө көркөм жетекчи болуп иштөөдөн баштаган. 1965-1967-жылдары Ысык-Көл облусунун Маданият үйүнүн көркөм жетекчиси болгон. 1967-жылы Москвадагы А.В.Луначарский атындагы Мамлекеттик театр өнөрү институтунун актёрдук факультетине өтүп, аталган институтту 1972-жылы бүтүргөн. 1972-1976-жылдары Ош облусунун драма театрында актёр болуп эмгектенет. 1976-жылдан тартып 1990-жылга чейин Т.Абдумомунов атындагы Кыргыз улуттук драма театрында чыгармачылык жолун уланткан. 1990-жылдан 1995-жылга чейин жаңы ачылган “Туңгуч” эксперименталдык жаштар театрында эмгектенип, 1995-жылы кайрадан өзү иштеп кеткен Т.Абдумомунов атындагы Кыргыз улуттук драма театрына келип кирет. Ошол кезден тартып өмүрүнүн акырына чейин аталган театрда актёрдук кызматты аркалап келди. 

Мукамбет Токтобаевдин өзүнүн чыгармачылык өмүрүндө театрда жана кинодо ойногон ролдору жүздөп саналат. Сахнада Ж.Б.Мольердин “Дворяндыкты эңсеген көпөсүндө” Журдендин,
М.Горькийдин “Акыркыларында” Иван Коломейцевдин, К.Жантөшевдин “Курманбегинде” Тейитбектин, М.Каримдин “Ай тутулган түнүндө” думананын, Б.Жакиевдин “Миң кыялында” Токтогулдун, Т.Абдумомуновдун “Машырбек үйлөнөтүндө” Машырбектин, Ч.Айтматовдун “Жаныбарым Гүлсарысында” Танабайдын,
В.Шекспирдин “Король Лиринде” Лирдин, Ж.Кулманбетовдун “Чыңгызхандын купуя сырында” Чыңгызхандын жана башка ролдорду чегине жеткире аткарган.

Ал эми “Он үчүнчү небере”, “Фудзиямадагы кадыр түн”, “Сокур кемпир көрөгөч”, “Той”, “Чиркин өмүр” “Белгисиз маршрут”, “Чыңгызхандын ак булуту” жана башка ушул сыяктуу тасмаларда ар түркүн жанрдагы жаркын образдары менен журтубуздун сүймөнчүлүгүнө ээ болгон. Залкар инсан дээрлик 50 жылдык талыкпаган чыгармачылык жолунда элибиздин эсинен кеткис жүзгө жакын театр жана кино образдарын жаратып, калкыбыздын рухий казынасынын байышына опол тоодой салымын кошту.

Мукамбет Токтобаевдин ак эмгеги өз баасын алып, 1974-жылы Кыргыз Республикасынын Маданият министрлигинин, 1975-жылы Кыргыз Республикасынын Жогорку Кеңешинин Ардак грамоталары менен сыйланган. 1986-жылы "Кыргыз Республикасынын Эмгек сиңирген артисти", 2000-жылы "Кыргыз Республикасынын Эл артисти" наамына татыктуу болгон. 1994-жылы Египеттеги Театр фестивалына катышкан. 2001-жылы М.Рыскулов атындагы Эл аралык сыйлыктын лауреаты, 2002-жылы “Кинонун отличниги” төш белгиси менен сыйланган.