Турдакун Усубалиевди акыркы сапарга узатуу зыйнатына байланыштуу Бишкектин айрым көчөлөрү жабылат

9-сентябрда мамлекеттик ишмер Турдакун Усубалиевди акыркы сапарга узатуу зыйнаты өтөт. Ага байланыштуу Бишкектин айрым көчөлөрүндө унаалардын жүрүүсүнө саат 08:00дөн 12:00гө чейин чектөөлөр киргизиле турганын Жол-кайгуул кызматынан билдиришти.

Чектөө киргизиле турган көчөлөр:

- Мамлекеттик резиденциядан баштап Тынчтык, Манас кең көчөлөрүнөн Чүй кең көчөсүнө чейин;

- Чүй кең көчөсүнүн Тыныстанов көчөсүнөн Жаш Гвардия бульварына чейинки аралыгы;

- Жаш Гвардия бульварынын Жибек-Жолу көчөсүнөн Чүй кең көчөсүнө чейинки аралыгы;

- "Ала-Арча" көрүстөнүнө жакын жайгашкан көчөлөр.

Т.Усубалиев 6-сентябрдан 7-сентябрга караган түнү узакка созулган оорудан улам 96 жашында көз жумду. Бүгүн мамлекеттик резиденцияда маркумдун жакындары аны менен коштошуп жатышат.

Автор: Жамалидин Парманкулов