20 жыл мурун кызмат учурунда жаракат алган милиционер батир алчулардын тизмесинен белгисиз себептерден чыгарылганын айтты

Бүгүн, 23-сентябрдагы маалымат жыйынында ИИМдин мурунку кызматкери, 2-топтогу майып Шерлан Шаршенов батир алчу милиционерлердин тизмесинен чыгып калганын билдирди.

Ал 1995-жылы Нарында милиция кызматкери болуп иштеп жүргөн учурда башынан оор жаракат алганын айтты.

"Чакыруу түшүп, баңгилер чогулган жерге барганда бирөө мени чапты. Ким экенин көрбөй калдым. Эч ким көңүл буруп, иш козгогон жок. Бир жылдан кийин ооруканага жатып, операция жасалды. Башыма аппарат коюлду",- дейт Ш.Шаршенов кызмат үстүндө алган жаракаты тууралуу.

Үй-бүлөсү менен көп жылдан бери Бишкекте батирде ижарада турганын кошумчалап, батир алуу үчүн кезекке турганына да бир топ жыл болгонун билдирди. "1997-жылы батир алуучу катары тизмеге киргизишти, бирок Бишкекке келгенде тизмеде жок болуп чыга келдим. ИИМден "Нарынга барып кезекке туруп келиңиз" дешкенде, ал жактагылар "Нарынга 100 жылда үй салынган эмес, мындан ары да салынбайт" деп күлүп жатышат.

Ден соолугума байланыштуу борбор калаада жашап турам. ИИМдегилер Нарынга жиберишет, алгач Мамлекеттик каттоо кызматынан, кийин "өлкө аймагында турак жайы жок" деген маалым кат алып кел деп ары-бери жөнөтүп жатышат. 7 айдан бери үнүмдү эч ким укпай жатат. Атайын түзүлгөн комиссия август айында берилбейт деген чечим чыгарыптыр",- деди милициянын мурунку кызматкери.

Автор: Айпери Ганыжан кызы
Фото: Айпери Ганыжан кызы