Футбол боюнча улуттук курам Тажикстан жана Бангладеш курамаларына каршы беттешке даярдыгын баштады

Футбол боюнча улуттук курама команда 28-сентябрда Бишкекте машыгуу сборун баштады. Муну менен футболчулар октябрь айында орун алуучу Тажикстан жана Бангладешке каршы беттешке даярдык көрүшөт. Бул тууралуу КРнын Футбол федерациясынан кабарлашты.

Маалыматка ылайык, учурда Александр Крестининдин жетекчилиги астында 20 оюнчу машыгып жатат. “Дордойдун” жарым коргоочусу Даврон Аскаровдун ордуна Элхан Темирбаев улуттук курамга чакырылды.

Жакын арада командага Тамирлан Козубаев, Эдгар Бернхардт, Ильдар жана Руслан Амировдор, Мирлан Мурзаев, Виталий Люкс, Виктор Майер, Павел Матяш, Азамат Байматов жана Валерий Кичин сыяктуу оюнчулар келип кошулат.

Кошумчалай кетсек, футболчуларыбыз Дүйнө чемпиондугунун тандоо турунда Тажикстан менен 8-октябрда, Бангладеш менен 13-октябрда кез келет. Беттештер Бишкекте Дөлөн Өмүрзаков атындагы башкы стадиондо орун алат.

Автор: Максат Кудайбердиев