Сүйүктүүсүн атып алган жөө күлүк Оскар Писториус 1 жыл абакта отурган соң үй камагына чыгарылды

2013-жылы сүйүктүүсү Рева Стенкампты тапанча менен атып өлтүрүп алган түштүк африкалык жөө күлүк Оскар Писториус үй камагына чыгарылды. Ал өткөн жылдын 21-октябрында 5 жылга эркинен ажыратылып, 1 жыл абакта отурду. Эми спортчунун калган 4 жылда үй камагында болору күтүлүүдө. Бул тууралуу чет элдик маалымат булактары кабарлады.

Маалыматка ылайык, спортчу үй камагында тиешелүү дарылануудан өтөт жана дайыма көзөмөл астында болот. Ага күнүнө 1 саат гана бош убакыт берилери айтылууда.

Кошумчалай кетсек, каргашалуу окуя 2013-жылы 14-февралда катталган. Үйүндө отурган спортчу аркы бөлмөдө бирөө жүргөнүн байкап, ууру кирди деген ойдо ага карата ок чыгарган. Бирок ал ууру эмес, өз сүйүктүүсү болуп чыккан.

Писториус - белгилүү түштүк африкалык спортчу. Ал бутуна темир салынганына карабай чыгаан спортчу катары таанылган. 6 ирет Паралимпиада оюндарын утуп алган.

Автор: Максат Кудайбердиев