Непалдын 5 футболчусу "мамлекетке чыккынчылык кылды" деп айыпталып, аларды өмүр бою эркинен ажыратуу каралууда

Непал курамасынын 5 футболчусуна бийлик тарабынан айып тагылды. Чет элдик маалымат булактары кабарлагандай, тиешелүү органдар футболчуларды сүйлөшүлгөн оюндарга катышкандыгы үчүн октябрдын ортосунда кармаган.

Өлкөнүн мыйзамында мындай көрүнүштөргө карата тиешелүү мыйзам бар. Мамлекеттин бүтүндүгүнө, баалуулуктарына жана суверенитетине шек келтирилген учурда мыйзам бузган адам өмүр бою эркинен ажыратылат. Футболчулардын сүйлөшүлгөн оюндарга катышканы аныкталса, алардын да өмүр бою эркинен ажыратылары күтүлүүдө.

Айыпталып жаткан футболчуларга токтолсок, курамдын капитаны Сагар Тапа, вице-капитан Сандип Рай, дарбазачы Ритеш Тапа, мурунку коргоочулар Бикаш Сингх Чхетри жана Анжан Кей-Си 14-октябрда кармалышкан. Иш каралып бүткөнгө чейин Непалдын бир дагы улуттук курамасы эл аралык мелдештерге катыша албайт.

Кошумчалай кетсек, бул Непал курамасына байланышкан алгачкы чуу эмес. Буга чейин Непалдын өспүрүмдөр курамасы Бишкекке келип, Азия чемпиондугунун тандоо туруна жолдомо алган. Бирок команданын курамында 16 жаштан жогорку курактагы футболчулар болгонуна байланыштуу команда мелдештен четтетилген. Алардын ордуна өспүрүм курактагы кыргыз футболчулары 2016-жылкы Азия чемпиондугуна катышмай болгон.

Автор: Максат Кудайбердиев
Фото: Интернеттен алынды