"Тагдырдын тамашасы, же жеңил парың менен!", "Кызматтагы роман" аттуу тасмалардын режиссёру Эльдар Рязанов 88 жашында көз жумду

"Кызматтагы роман" тасмасынан көрүнүш.

"Тагдырдын тамашасы, же жеңил парың менен!" тасмасынан көрүнүш.

"Карнавал түнү" тасмасынан көрүнүш.

Советтик жана орусиялык кинорежиссёр, сценарист, актёр, педагог, жазуучу, акын, драматург, продюсер Эльдар Рязанов 30-ноябрга караган түнү дүйнө салды. Ал дем алуу органдарындагы ооруга байланыштуу 21-ноябрда ооруканага жаткырылып, 29-ноябрда абалы кескин начарлап кеткени белгилүү болгон. Аны жасалма дем алдыруучу аппаратка туташтырышканы менен, режиссёр дүйнө салган.

Эльдар Рязанов 1927-жылы 18-ноябрда Самарада туулган. С.И.Герасимов атындагы Бүткүл орусиялык кинематография университетине тапшырып, 1950-жылы "Алар Москвада окушат" аттуу дипломдук иши менен университетти аяктап, көптөгөн документалдуу тасмаларды тарткан.

1955-жылы "Мосфильм" киностудиясынын режиссёру болуп дайындалып, "Жазгы үндөр" аттуу ревю-тасмасын койгон. Бир жылдан кийин "Карнавал түнү" кинокомедиясын тарткан. Э.Рязановдун "Италиялыктардын Орусиядагы укмуштуудай окуялары", "Арыз китебин бергиле", "Унаадан сак бол", "Тагдырдын тамашасы, же жеңил парың менен!", "Кызматтагы роман" аттуу тасмалары ийгиликтүү болгон.

Автор: Айпери Ганыжан кызы