Түркиялык футболчу Арда Туран жарым жылдан кийин ойноп баштайт, ал "Барселонада" №7-футболканы тандады

Түркиялык футболчу, жай айларында испаниялык "Барселона" футболдук клубунун катарына кошулган Арда Туран 1-январдан тарта майданга чыга баштайт. Бул тууралуу клубдун расмий сайты кабарлайт.

Ал "Барселонанын" курамына өткөнү менен, клубга оюнчуларды каттоого тыюу салынгандыктан, 6 айдан бери майданга чыккан эмес. Ардага майданга чыкканга 1-январдан тарта уруксат берилет. Ошондой эле ал клубда №7-футболканы тандады. Акыркы жылдары бул номурдагы футболка менен Давид Вилья, Алексис Санчес, Педро Родригес сыяктуу футболчулар ойноп келишкен.

Арда клубга жаңы келгенде команда лидери Лионель Месси өзү алып жүргөн №10-футболканы Ардага берүүгө даяр экенин билдирген. "Месси мага 10-номурду берүүгө макул экенин айткан. Мен муну мага болгон сый катары кабыл алдым",- деп билдирген футболчу.

Автор: Максат Кудайбердиев
Фото: Интернеттен алынды