Футбол калысы Бахадыр Кочкаровго Даңк медалы ыйгарылды

Равшан Ирматов баштаган калыстар тобу Дүйнө чемпиондугунда кезектеги беттеш алдында. Бул жолу алар Коста-Рика жана Голландия курамаларынын беттешин тейлешкен.

Эл аралык футбол федерациясынын (ФИФА) калысы Бахадыр Кочкаров Даңк медалы менен сыйланды. Бул тууралуу президенттик аппараттан кабарлашты.

Маалыматка ылайык, тиешелүү буйрукка президент Алмазбек Атамбаев бүгүн 31-декабрда кол койду. Кочкаров көп жылдан берки эмгеги, өлкөнүн социалдык-экономикалык, интеллектуалдык жана руханий жөндөмүн бекемдөөгө кошкон салымы үчүн сыйланды.

Кошумчалай кетсек, Б.Кочкаров өзбекстандык калыс Равшан Ирматовдун бригадасына кирип, 2 Дүйнө чемпиондугунда (2010-жылы жана 2014-жылы) анын ассистенти катары кызмат кылган. Бул калыстар Дүйнө чемпиондуктарынын тарыхында эң көп оюнду тейлеген калыстар катары рекорд жаратышкан (9 оюн). "ЮАР-2010" Дүйнө чемпиондугунан кайтып келгенде Б.Кочкаровго "Дене тарбия жана спортко эмгек сиңирген ишмер" наамы берилген.

Автор: Максат Кудайбердиев
Фото: Интернеттен алынды