Индонезиянын борборунда адам өмүрүн алган бир нече жардыруу болду

Индонезиянын борбору Жакарта шаарында бир катар күчтүү жардыруулар орун алды. Жардыруу болгон жерде ок атышуу да болду. Бул тууралуу 14-январда чет элдик басылмалар жазып чыгышты.

Маалыматтарга караганда, шаардын борбордук бөлүгүндөгү полиция бөлүмүнүн алдында, соода түйүнүнүн жанында, борбордук көчөдө, мейманканада 6 жолу жардыруу болгон. Анда жардыргыч заттардан сырткары 3 жан кечти өзүн өзү жардырганы да айтылууда. Жалпысынан 14 согушкердин чабуул жасаганы маалымдалды. Алдын ала маалыматтар боюнча, кеминде 7 адам мерт болду. Каза болгондордун жана жабыркагандардын саны такталууда. Жардыруу боюнча жоопкерчиликти "Ислам мамлекети" алды.

Автор: Айпери Ганыжан кызы