Мушкер Дэвид Хэй профессионалдык рингге кайтып, атаандашын 1-раундда нокаутка учуратты

Британиялык мушкер Дэвид Хэй профессионалдык рингге кайтты. Ал 16-январда австралиялык Марк де Мори менен беттешип, атаандашын 1-раундда нокаутка учуратты.

Беттеште Хэй демилгени колго алып, атаандашын качырып иштеп баштады. 2012-жылдан бери рингге чыга элек британиялык мушкерди Марк де Мори оңой ойлодубу, көп учурда коргонууда туруп берип жатты. 1-раунд ортолоп калганда Хэй удаасы менен бир канча сокку узатып, атаандашын сулатты.

Бул жеңиш британиялык мушкердин карьерасындагы 27-жеңиши болуп калды (2 ирет жеңилген). Ал эми профессионалдык карьерасында 30 беттеш өткөргөн Марк де Мори 2-ирет жеңилип отурат.

Хэй буга чейин германиялык Мануэль Чарр жана Тайсон Фьюри сыяктуу мушкерлер менен беттеш тууралуу келишимге кол койгон. Бирок айрым себептерден улам ал беттештер болбой калган.

Автор: Максат Кудайбердиев
Фото: Интернеттен алынды