Доха. Дүйнөнүн ар тарабынан чогулган спорт журналисттери сириялык качкын Усама Абдель Мохсенге, уулу Заидге колдоо көрсөтүштү

Максат Кудайбердиев Усама Абдель Мохсен жана уулу Заид менен

Учурда Катар мамлекетинин Доха шаарында Эл аралык спорт басылмаларынын ассоциациясынын дүйнөлүк конгресси өтүп жатат. Тарыхта 79-ирет уюштурулуп жаткан конгресстин расмий ачылышы 8-февралда орун алган.

Ачылыш аземинде дүйнөнүн түрдүү аймактарынан келген спорт журналисттерине белгилүү сириялык качкын Усама Абдель Мохсен менен уулу Заид тууралуу видео көрсөтүлдү. Андан соң ал экөө эл алдына чакырылды. Видеонун мазмунуна токтолсок, качкындарга колдоо көрсөтүү чакырыгы жасалып, спорт чөйрөсүндө качкындарга сый мамиле кылынуусу керектиги айтылды.

Эсиңиздерде болсо, Сириядан качып бараткан качкындарды видеого тартып жаткан венгриялык оператор уулун көтөрүп чуркап бараткан Усама Абдель Мохсенди чалып жыккан. Бул окуя коомдо чоң талкуу жараткан. Кийин бул качкындарга көп колдоо көрсөтүлгөн. Алардын катарында футболчу Криштиану Роналдунун Заидди майданга ала чыкканы, испаниялык кайсы бир клуб Усама Абдель Мохсенге жумуш бергени эл эсинде калды.

Автор: Максат Кудайбердиев
Фото: Максат Кудайбердиев