Футзал боюнча улуттук курамдын машыктыруучусу: "Иранга каршы беттеште оюнчулар берилген тапшырманын 5 гана пайызын аткарышты"

17-февралда футзал боюнча Өзбекстандын Ташкент шаарында өтүп жаткан Азия чемпиондугунун чейрек финалдык оюндары болду. Анда кыргыз футзалчылары Иран курамасы менен беттешип, 7:0 эсебинде утулуп калышты. Беттеште эки команданын ортосунда чеберчилик жагынан чоң айырмачылык байкалып турду. Бул жеңилүүдөн кийин улуттук кураманын башкы машыктыруучусу Андрей Полховский ой бөлүштү:

"Албетте, айта турчу сөз жок, себеби баарын эсеп тактасындагы сандар айтып турат. Эки команданын деңгээлинде чоң айырмачылык бар. Менин футболчуларым коюлган пландын 5 пайызын да аткара алышкан жок. Атаандашыбыз тууралуу жакшы билгенбиз. Ирандын командасы өтө мыкты команда. Аларды жеңиши менен куттуктагандан башка арга жок..."

Кошумчалай кетсек, бул мелдеште медалдардан тышкары Колумбияда өтө турган Дүйнө чемпиондугуна 5 жолдомо ойнотулат. Бул жолдомонун төртөөнө жарым финалга чыккан Өзбекстан, Иран, Таиланд жана Вьетнам курамалары ээ болушту. Дагы бир жолдомону чейрек финалда утулуп калган Япония, Кыргыз Республикасы, Ирак жана Австралия курамалары өз ара талашат.

Кыргыз футзалчылары жолдомо үчүн бүгүн Япония курамасы менен беттешет. Беттешке Бишкек сааты боюнча 17:00дө старт берилет.

Автор: Максат Кудайбердиев
Фото: Интернеттен алынды