Ошто Аялдардын эл аралык күнүнө карата айымдар арасында волейбол жана баскетбол мелдеши өтөт

Ошто 8-Март - Аялдардын эл аралык майрамына карата 3-4-март күндөрү айымдар арасында волейбол жана баскетбол мелдеши өтөт. Бул тууралуу Ош мэриясынан билдиришти. Маалым болгондой, мелдеш эки топко бөлүнүп өткөрүлөт:

1-топ - Ош шаарында жайгашкан бардык каалоочу мекеме-ишканалардын, күч курамдарынын, билим берүү, медицина жана коомдук уюмдардын кызматкерлеринин арасында;

2-топ - шаардагы жогорку жана орто окуу жайларынын студенттеринин арасында.

Мелдештин финалдык таймашында жеңишке жеткен командалар Ош шаардык дене тарбия жана спорт комитети тарабынан дипломдор, кубоктор жана баалуу белектер менен сыйланышат.

“Бул мелдештин негизги максаты - республикалык, эл аралык мелдештерге Ош шаарынан мыкты спортчуларды жана курама командаларды тандап алуу, спортту калк арасында пропагандалоо, аларды спорт менен машыгууга үндөө, ошондой эле шаардыктардын маанайын спорт аркылуу көтөрүү. Ошондуктан шаардагы бардык каалоочу мекеме-ишканалар жана окуу жайлардын командалары катыша алат”,- деди Ош шаардык дене тарбия жана спорт комитетинин төрагасы Кылычбек Саркарбаев.

Автор: Наргиза Бекжанова
Фото: Интернеттен алынды