Мелдеш жадыбалында эч кандай орун алмашуу болгон жок. Улуттук курамабыз Дүйнө чемпиондугунун тандоо турун тайпада 3-орунду ээлеп жыйынтыктады.
SUPER.KG порталы улуттук курама командабыздын коноктогу жеңиши менен бардык күйөрмандарын куттуктайт! Албетте, жеңиш оңой болду деп айтканга болбойт.
90-мүнөт. Ышкырык жаңырып, оюн аяктады. Кыргыз футболчулары көптөн күтүлгөн жеңишке жетишишти, себеби Бишкектеги тең чыгууга күйөрмандардын ичи чыкпай калган.
82-мүнөт. Кыргыз футболчулары топко ээлик кылып, атаандашты топсуз чуркатуу аракетин көрүшүүдө. Машыктыруучу Эдгар Бернхардттын ордуна Павел Сидоренкону майданга чыгарды.
78-мүнөт. Тажик футболчулары топ кыргыз футболчуларынын биринин колуна тийгенин айтып, пенальти сурашты. Калыс эреже бузуу болбогонун айтты. Нааразы болгон оюнчуга сары айып кагазы көрсөтүлдү.
70-мүнөт. Оюндун бүтөрүнө 20 мүнөт калды. Күйөрмандар тажик футболчуларынан гол талап кылышууда. Футболчулар болгон аракетин көрүшкөнү менен, натыйжа чыга элек.
67-мүнөт. Эреже бузуудан кийин кыргыз футболчулары айып соккусуна ээ болушту. А.Исраилов көтөргөн топ эч кимге таамай барган жок.
62-мүнөт. Оюндун темпинде өзгөрүү жок. Командалар баштагыдай активдүү ойноп жатышат. Кыргыз футболчулары үчүн эсепти кармап калуу маанилүү болсо, атаандаш эсепти теӊегенге кызуу аракет кылууда.
56-мүнөт. Кыргыз футболчулары атаандаштын чабуулдарын токтотуп, каршы чабуул убактысын күтүү менен алек. Коргоочубуз Дениэл Тего эреже бузгандыгы үчүн сары айып кагазын алды.
54-мүнөт. Атаандаштардын машыктыруучусу менен оюнчулардын ортосунда кийим которуучу жайда олуттуу сүйлөшүү болгону дароо байкалды. Атаандаш арты-артынан чабуул уюштуруп жатат.
51-мүнөт. Тажик футболчулары 2 кооптуу чабуул уюштурушту. Анын бири гол менен аяктап, бирок калыс аны эсепке алган жок, себеби оффсайд абалы катталып калганын капталдагы калыс көрсөттү.
45-мүнөт. Ал ортодо калыстын ышкырыгы жаңырып, экинчи тайм башталды.
Голдун автору - Виталий Люкс. Футболчу улуттук курама команда үчүн карьерасында экинчи голун киргизди.
Оюндун алгачкы 45 мүнөттүгү жыйынтыкталды. Кыргыз футболчулары 1:0 эсебинде алдыда. Командалар 15 мүнөттүк эс алуудан кийин майданга кайтып келишмекчи.
37-мүнөт. Кыргыз футболчуларында дагы бир гол жаратуу мүмкүнчүлүгү болгон, бирок Виталий Люкс мүмкүнчүлүктү туура пайдалана алган жок. Себеби коргоочулар тоскоолдук жаратышты. 
30-мүнөт. Кыргыз футболчулары коргонууда көбүрөөк ойноп, каршы чабуулдарды уюштуруп жатышат. Ал эми атаандаш чабуулдарды уюштуруп, эсепти теңегенге аракет кылууда.
25-мүнөт. Оюндун 25 мүнөтү артта калды. Азырынча футболчуларыбыз 1:0 эсебинде утуп жатышат. Голду Виталий Люкс киргизди (18-мүнөт).
17-мүнөт. Кыргыз футболчуларынын каршы чабуул уюштуруу аракетинен майнап чыккан жок. Ахлетдин Исраилов оң капталдан суурулуп чыгып, топту көтөрүүгө аракет кылды. Каршылаштар эреже бузгандай таасир калтырышты, бирок калыс эреже бузулбаганын тастыктап, ышкырган жок.
11-мүнөт. Тажикстан курамасынын чабуулчусу дарбазага 3 ирет сокку узатканы менен, дарбазачыбыз голдон сактап калды. Тажик футболчулары каршы дарбазада активдүү ойноп жатышканын моюнга алышыбыз керек.
1-мүнөт. Үй ээлери алгачкы мүнөттөн тарта активдүү оюнга киришти. 
Машыктыруучу Александр Крестинин майданга төмөнкү футболчуларды чыгарган:
Дарбазачы: Павел Матяш ("УиТМ" футболдук клубу, Малайзия).
Коргоочулар:
Азамат Байматов ("Ситра", Бахрейн), Валерий Кичин ("Тюмень", Орусия), Виктор Майер ("Меппен", Германия), Дениэл Тего ("Дордой").
Жарым коргоочулар:
Бахтияр Дүйшөбеков ("Крумкачы", Беларусь), Фархат Мусабеков ("Академия", Молдова), Эдгар Бернхардт ("Аль-Оруба", Оман), Ахлетдин Исраилов ("Динамо-2", Украина), Антон Землянухин ("Сисакет", Таиланд).
Чабуулчу:
Виталий Люкс ("Унтерхахинг", Германия).
Дүйшөмбү шаарында футбол боюнча Дүйнө чемпиондугунун тандоо турунда Тажикстан - Кыргыз Республикасы беттеши башталды. Башкы калыстын милдетин аткарган өзбекстандык Азиз Асимов беттешке 19:00дө старт берди.
Мелдеш жадыбалында эч кандай орун алмашуу болгон жок. Улуттук курамабыз Дүйнө чемпиондугунун тандоо турун тайпада 3-орунду ээлеп жыйынтыктады. 
