Борбордо "акча талап кылып жарандын эки колун, эки тизесин жана сан сөөгүн сындырган" деген шек менен Ысык-Көл облусунун 2 тургуну кармалды

Борбордо "акча талап кылып жарандын эки колун, тизесин жана сан сөөгүн сындырган" деген шек менен Ысык-Көл облусунун 2 тургуну кармалды. Бул тууралуу Бишкек шаардык ички иштер башкы башкармалыгынан билдиришти.

Маалыматка ылайык, 31-март күнү №4-шаардык клиникалык ооруканага сан сөөгүнүн жабык сыныгы, эки колу жана эки тизеси сынган абалда И.А. аттуу жаран келип түшкөн. Жабырлануучу аны саат 17:00 чамасында Дэн Сяопин жана Заводская көчөлөрүнүн кесилишинен белгисиз адамдар күч колдонуу менен жол тандабаска салып Селекция айылына алып барышып катуу токмоктошконун билдирген. Анын айтымында, аны сабагандар карызды берүүнү талап кылышкан.

Бул факт боюнча "опузалап талап кылуу" жана "саламаттыкка атайылап оор залал келтирүү" беренелери менен кылмыш иши козголгон. Жүргүзүлгөн иликтөө иштеринин алкагында кылмышка шектүү катары борбор калаада жашаган Ысык-Көл облусунун 27 жаштагы М.А. жана Б.Б. аттуу (кылмыштуу топтун мүчөсү) тургундары кармалган.

Автор: Мальвина Уметбекова