Акыркы 10 күн аралыгында мыйзамсыз жүгүртүүдөгү 8 килограммдан ашуун баңгизат алынды

Акыркы 10 күн аралыгында мыйзамсыз жүгүртүүдөгү 8 килограмм 474 грамм баңгизат алынды. Бул тууралуу бүгүн, 25-апрелде Баңгизатты көзөмөлдөө мамлекеттик кызматынын басма сөз бөлүмүнөн билдиришти.

Маалым болгондой, 14-апрелден 24-апрелге чейинки убакыт аралыгында 7 баңги кылмышы катталып, жалпы салмагы 8 килограмм 474 граммды түзгөн баңгизат (629 грамм гашиш, 7 килограмм 845 грамм марихуана) алынып, 10 адам кармалды.

Жүргүзүлгөн ыкчам аракеттердин алкагында 14-апрель күнү Бишкек-Каракол унаа жолунан БМВ үлгүсүндөгү унаа текшерүүгө токтотулган. Унаанын 1969-жылы туулган У.А. аттуу жүргүнчүсүнүн жанынан жалпы салмагы 7 килограмм марихуана табылган. Ал эми 16-апрель күнү Аламүдүн районунан Ысык-Көл облусунун 1989-жылы туулган М.К. аттуу тургуну кармалган. Анын жанынан 22 грамм гашиш жана 343 грамм марихуана, жалпы салмагы 365 граммды түзгөн баңгизат алынган. Учурда иликтөө иштери жүрүүдө.

Автор: Мальвина Уметбекова