Ысык-Көлдө 26 жаштагы кызды зордуктоого шектелген эки жаран кармалды

Ысык-Көлдө 26 жаштагы кызды зордуктоого шектелген эки жаран кармалды. Бул тууралуу бүгүн, 26-апрелде SUPER.KG порталына Ысык-Көл ОИИБинин басма сөз кызматынан билдиришти.

Маалым болгондой, милиция кызматкерлерине арыз менен Каракол шаарынын 26 жаштагы тургуну кайрылган. Ал 30-мартта саат 22:25 чамасында үйүнө келе жаткан маалда белгисиз адамдар аны күч менен Хонда Степвагон үлгүсүндөгү унаага отургузуп, ээн талаага алып барып кезек менен зордуктап, эки уюлдук телефонун, акча каражатын тартып алганын билдирген.

Жүргүзүлгөн иликтөө иштеринин алкагында аталган кылмышка шектүү катары Каракол шаарынын 30 жаштагы Кубанычбек О. аттуу тургуну кармалды. Сурак учурунда кылмышка шектүү анын жанында 32 жаштагы Арзымат К. аттуу таанышы да болгонун билдирген. Кылмышка шектүүлөр мас абалда болгондорун билдиришкен. Бул факт боюнча “зордуктоо” жана “тоноо” беренелери менен кылмыш иши козголуп, учурда тергөө амалдары жүрүүдө.

Автор: Алина Токтакунова
Фото: Ысык-Көл ОИИБ