Жалал-Абад облусунда нөшөрлөп жааган жамгырдан улам сел жүрүп, турак жайлардын жер төлөлөрүнө чейин суу кирип кетти

Жалал-Абад облусунда нөшөрлөп жааган жамгырдан улам сел жүрүп, турак жайлардын жер төлөлөрүнө чейин суу кирип кетти. Бул тууралуу бүгүн, 27-апрелде Өзгөчө кырдаалдар министрлигинен билдиришти.

Маалыматка ылайык, 26-апрелде саат 06:00 чамасында Базар-Коргон районундагы Могол айыл аймагынын Ооган-Талаа айылында катуу жааган жамгырдын кесепетинен сел жүрүп, 9 кожолуктун турак үйүн жана 46 кожолуктун короосун суу каптаган. Маданият үйүнүн жер төлөсүнө сел суулары кирип, бирок кыйроолор катталган жок. Комиссия суу каптаган 9 кожолуктун турак жайларында жеринде тактоо иштерин жүргүзүшүп, азыркы учурда сел суулары турак жайлардын жер төлөлөрүнө топтолуп тургандыктан, жабыр тарткан даражаларын так аныктоо мүмкүн болбогондугуна байланыштуу анын жыйынтыгы 10-15 күн аралыгында чыкмакчы. Комиссия турак жайларды кайрадан изилдеп чыгып, техникалык абалына баа берет. Жергиликтүү тургундардан 46 киши жана 3 суу сордуруучу мотопомпа тартылып, жергиликтүү тургундар тарабынан тазалоо жумуштары жүргүзүлүүдө.

Ал эми 26-апрелде саат 04:00 чамасында Сузак районунун Кызыл-Туу айыл аймагындагы Алмалуу-Булак айылынын Үч-Чат жайлоосунда 24-апрелде түшкөн жер көчкүнүн жогору жагынан дагы бир жер көчкү түшкөн. Көчкүдөн телемунарадан кеткен электр чубалгысынан 1 даана темир-бетон мамысы кулап, электр чубалгысы үзүлүп кеткен. Электр энергиясы 24-апрелде жер көчкү коркунучунан энергетиктер тарабынан өчүрүлгөн. Адам өмүрүнө зыян келтирилген эмес.

Жер көчкүнүн жылуусу активдүү, алдынкы тарабы Алмалуу суусуна жетип токтогон. Суу 1 секундасына 10 литр көлөмүндө агып жатат. Жер көчкүнүн мындан аркы жылуусунан Алмалуу суусу толук тосулуп, андан 8 чакырым төмөн жайгашкан Алмалуу-Булак айылына (73 кожолук) коркунуч туудурушу мүмкүн. КРнын Өзгөчө кырдаалдар министрлигинин Сузак райондук бөлүмүнүн башчысы, Өзгөчө кырдаалдарды божомолдоо жана мониторинг департаментинин башкы адиси жана Кызыл-Туу айыл аймагынын башчысы жеринде изилдөө иштерин улантышып, жергиликтүү тургундарга түшүндүрүү иштерин жүргүзүшүүдө. Жайыт комитетине жер көчкүнү мындан ары да көзөмөлдөп туруу милдеттендирилди.

Автор: Алина Токтакунова