Оор атлетика боюнча улуттук курам "Рио-де-Жанейро-2016" Олимпиадасына жолдомо алды

Бүгүн, 30-апрелде Өзбекстандын Ташкент шаарында оор атлетика боюнча Азия чемпиондугу жыйынтыкталды. “Рио-де-Жанейро-2016” Олимпиадасына жолдомолор ойнотулуучу мелдеште Кыргыз Республикасынын курама командасы командалык эсепте 4-орунду ээледи.

Мелдештин жобосу боюнча, Олимпиадага командалык эсепте алдынкы 5 орунду ээлеген командалар жолдомо алмак. КРнын курама командасы командалык эсепте 4-орунду ээлеп, бир жолдомого ээ болду. Кайсы спортчу барары азырынча белгисиз, анткени бул жолдомо командалык эсепте ойнотулду. Ал эми кайсы спортчу барарын машыктыруучулар штабы чечмекчи.

Ташкенттеги мелдеште кыргыз спортчуларынан Иззат Артыков 69 килограмм салмакта күч сынап, алтын медаль тагынган.

Айта кетсек, мамлекетибизде ушуну менен 10 жолдомо болду. Буга чейин жеңил атлетчилер Мария Карабицкая, Юлия Андреева, Дарья Маслова, грек-рим күрөшүнөн Арсен Эралиев, Жанарбек Кенжеев, Мурат Рамонов, эркин күрөштөн Магомед Мусаев, кыз-келиндер күрөшүнөн Айсулуу Тыныбекова жана мушкер Эркин Адылбек уулу Олимпиада оюндарына жолдомо алган.