Бүгүн Чемпиондор Лигасынын экинчи финалчысы аныкталат, испаниялык "Реал" англиялык "Манчестер Ситини" кабыл алат (анонс)

Бүгүн, 4-майда Европадагы ири футболдук лига - Чемпиондор Лигасынын жарым финалында "Реал" жана "Манчестер Сити" клубдары жооптук оюнда кез келишет. Мадрид шаарында өтө турган беттеште үй ээлеринин лидери Криштиану Роналдунун майданга чыгары белгилүү болду. Бирок "Реалдын" курамынан Карим Бензема жаракатынан улам ойнобой калышы мүмкүн. "Манчестер Ситинин" курамынан болсо Давид Силва командасына майданда жардам бере албайт.

“Реал” (Испания) – “Манчестер Сити” (Англия)

Стадион: Мадрид шаары, "Сантьяго Бернабеу" стадиону

Калыс: Дамир Скомина (Словения)

Башталышы: 00:45 (Бишкек сааты)

(алгачкы оюнда 0:0 эсебиндеги тең чыгуу катталган)

Зинедин Зидан, "Реалдын" башкы машыктыруучусу:

- Криштиану Роналду оюнга чыкканга 100 пайыз даяр. Акыркы аптада ал калыпка келди. Биз финалга чыкпай калсак "катастрофа" болот. Жооптук оюн, албетте, алгачкы оюнга салыштырмалуу кыйын. Ошентсе да 90 мүнөт ичинде финалдык жолдомону камсыздайбыз деп ишенем.

Мануэль Пеллегрини, "Манчестер Ситинин" башкы машыктыруучусу:

- "Манчестер Сити" буга чейин болуп көрбөгөн ийгиликти багынтып, финалга чыгуу аракетин көрүп жатат. Алгачкы оюнда атаандашка басым көрсөткөнгө аракет кылганбыз, бирок анда тапшырма толук аткарылбай калган. Мыкты оюндардын тагдырын мыкты оюнчулар чечет. Бизде мыкты футболчулар аз эмес, андыктан максатка жеткенге үмүт бар. Команданы чабуулда гана эмес, коргонууда да чоң жумуштар күтүп турат.

Автор: Максат Кудайбердиев