МЕДИА-ПОРТАЛ: Айымжан футбол боюнча улуттук курамга дем берчү "Сүрөөн" чыгармасынын клибин тартуулады

"Медиа-портал" бөлүмү дагы бир өзгөчө жаӊы чыгарма менен толукталды. Футбол федерациясы менен биргеликте жаш ырчы Айымжан "Сүрөөн" ырынын жаӊы клибин тартуулады.

Ырчынын менеджери Мирзада Майчинова клип тууралуу мындай дейт:

"Бул ырдын идеясы өткөн жылы жаралган. 7 ай мурун Футбол федерациясы менен сүйлөшүүлөр башталган. "Ушундай идея бар, колдоп бериӊиздер, чыгармачыл адамдар бири-бирибизди колдошубуз керек" деп кайрылсак, алар биздин сунушту кабыл алышты.

Клип 2,5 айда тартылып бүттү. Кайталанма эмес, өзгөчө клип болсун деп бул чыгарманын үстүндө көпкө иштедик. Андыктан кыйынчылыктар болду. "Бул жерде тартканга болбойт" деп тыюу салган адамдарга Футбол федерациясынан расмий кат алып келип, клип тартууну улантып жаттык.

Футбол федерациясы расмий колдоого алып жатты, бирок каржы жагынан эмес. Биз өзүбүз иштеп тапкан акчабызга клип тарттык. Азырынча биздин өлкөдө кимдир бирөөнүн чыгармачылыгына акчалай жардам көрсөткөн көрүнүштөр байкала элек".

Айымжандын "Сүрөөн" ырынын клибин бул жерден көрүӊүз.

Автор: Турсунай Алымкулова