Карим Бензема, Марко Ройс, Хуан Мата... Футбол боюнча Европа чемпиондугуна катышпай турган 11 мыкты футболчу

Бүгүн, 10-июнда Францияда футбол боюнча Европа чемпиондугу старт алат. Мелдешке жалпысынан 24 команда катышат жана оюндар 10 шаарда өткөрүлмөкчү.

Футболдун казаны кайнаган Европанын биринчилиги ар дайым дүйнө жүзүндөгү футбол сүйүүчүлөрүнүн көңүлүн буруп келген. Бул мелдеште ойноону көптөгөн футболчулар кыялданышат. Тилекке каршы, баарынын кыялдары орундала бербейт. Мисалы, быйылкы мелдешке түрдүү себептерден улам төмөнкү атактуу футболчулар катыша алышпайт. Алар да биз сыяктуу эле эми беттештерди үйдө сыналгыдан көрүшөт.

Алардын арасынан Марко Вератти, Илкай Гундоган, Марко Ройс сыяктуу футболчулар мелдешке жаракаттан улам катыша алышпайт. Ал эми жаш курагына байланыштуу Андреа Пирло курамга чакырылган жок. Командаларындагы атаандаштыкты жеңе албай мелдешке катышуу укугунан ажырагандар: Пепе Рейна, Хатем Бен Арфа, Хуан Мата, Диего Коста. Ал эми Деян Ловрен машыктыруучу менен жаман мамиледе болгону үчүн курамга чакырылган жок. Карим Бензема командалашын интимдик видеолор үчүн шантаждаганы үчүн Европа чемпиондугуна катышпай турган болду. Ал эми Мамаду Сакхо допингге байланыштуу курамга чакырылган жок.