"Багынганга чейин сен тагдырыңдан күчтүүсүң". Легендарлуу мушкер Майк Тайсон 50 жашка толду

Көзүнүн курчу кетип, карылыкка моюн суна түшкөн Майк Тайсон.

Жокчулук менен барчылыктын, түрмө менен баңгизаттын, жеңиш менен жеңилүүнүн даамын таткан атактуу америкалык мушкер Майк Тайсон 50 жылды артка таштады. Мушкер бүгүн, 30-июнда 50 жашка толду.

"Темир Майк" 1966-жылы Бруклинде жарыкка келген. 12 жашында легендарлуу мушкер Мухаммед Алини көргөндөн кийин спорттун бокс түрүнө кызыгуусу башталган. Бокс дүйнөсүнө аралашып, катар-катары менен атаандаштарын сулатуу менен өзүн дүйнөгө тааныта алган. Ал профессионалдык рингде 60 беттеш өткөрүп, 50 ирет жеңишке жетишкен. 6 беттеште ал жеңилип калган. Анын катышуусундагы 2 беттеш жокко чыгарылган.

Тайсонду бокс дүйнөсүндөгү аброю боюнча Мухаммед Алиден кийинки орунда турат десек, көпчүлүк колдосо керек. Себеби мушкер миллиондорго өзүнө ишенүү менен кантип ийгиликке жетүү керектигин далилдей алган. Мушкердин 50 жылдыгына карата ага таандык цитаталарды чогулттук.

“Машыгуу, өзүңдү бир калыпта алып жүрүү – торго түшкөн сыяктуу... Кылгың келбеген жумушту аткаруу канчалык кыйын”.

“Беттеш 13 секундага созулушу керек. 2 секунда атаандашка жакындаганга, 1 секунда сокку узатканга кетет. Калган 10 секундада беттеш калысы 10го чейин санайт”.