Актёр Жонни Депп 400 миллион долларлык мүлкүн сактап калуу үчүн аялы менен соттошот

Жонни Депп менен Эмбер Хёрд

Жонни Депп менен Ванесса Паради

17-августта белгилүү актёр Жонни Депптин аялы Эмбер Хёрд менен ажырашуу процесси боюнча кароо өтөт. Эмбер Хёрд актёрду "мага кыйноо көрсөткөн" деп айыптаса, актёр "баары куру жалаа" деп, өзүнүн күнөөсүз экенин далилдөө үчүн бардык күбөлөрдү топтоодо. Бул маселени чечүүдө эми ага анын мурунку жарандык никедеги аялы Ванесса Паради жардамга келет. Ал Деппти сотто коргоого макулдугун берген.

"Жонни Депп - менин балдарымдын атасы, ал абдан ак көңүл, бизди сүйгөн, биз үчүн сүйүктүү адам. Мен чындап ага болгон айыптоолор жалган экенине ишенем. Биз чогуу болгон жылдары Жонни бир да жолу мага күч колдонуп, ачуусун көрсөткөн эмес. Ал тууралуу айтылып жаткан сөздөр мен 14 жыл бою эң сонун күндөрдү өткөргөн адамга (Жонни Деппке) тиешеси жок", - деп Ванесса Паради чет элдик басылмаларга берген маегинде билдирген.

Белгилей кетсек, Жонни Депп менен Эмбер Хёрд 2011-жылы тасма талаасында таанышышкан. Сүйүшкөндөр 2015-жылы Лос-Анжелес шаарында чакан той өткөрүшкөн. Кийин той актёрдун жеке аралдарынын биринде ал жактагы жакын дос-туугандары үчүн уланган.

Үйлөнүү тойдон 15 ай өткөндө Эмбер Хёрд ажырашуу үчүн арыз берип, жолдошунан колдоо иретинде 400 миллион долларлык мүлк сураган. Учурда актёр мүлкүн өзүндө алып калуу үчүн колдон келгенинин баарын жасоодо.

Автор: Турсунай Алымкулова