Америкалык ырчы Бритни Спирс тууралуу тасма тартылат

Бритни Спирс

Бритни Спирстин образын Наташа Бассетт жаратат

2016-жылдын сентябрь айында Канаданын Ванкувер шаарында америкалык ырчы Бритни Спирс тууралуу тасманы тартуу иштери башталат. Бул тууралуу чет элдик басылмалар жазып чыгышты. Маалыматтарда башкы ролду актриса Наташа Бассетт ойноору айтылат.

"Бритни" тасмасы эки саатка созулуп, анда ырчынын атак-даңкка жетүүдөгү тарыхы, ийгиликтери, жашоосундагы ийгиликсиз учурлары баяндалмакчы. Ошондой эле ырчынын күйөрмандары Бритни кантип ырчылык карьерасын баштагандыгы, ырчы Жастин Тимберлейк менен болгон сүйүү романы жана мурунку никелери тууралуу маалыматтарды ала алышат. Тасма 2017-жылы жарыкка чыгары пландалууда.

Белгилей кетсек, "Грэмми" сыйлыгынын ээси, ырчы, бийчи, ырларынын автору жана актриса Бритни Спирс 1981-жылы 2-декабрда АКШнын Луизиана штатындагы Кентвуд шаарында төрөлгөн. Атагы алыска тараган Бритнини белгилүү "Rolling Stone" журналы дүйнө боюнча учурдагы ийгиликтүү 25 айымдын катарына киргизген.

Автор: Турсунай Алымкулова